Qazaq tilinde bilim beretin balabaqshalarǵa suranys ósýde - mınıstrlik

ASTANA. QazAqparat – Mektepke deıingi bilim berý uıymdarynda qazaq tilinde oqytatyn toptarǵa suranys artyp keledi. Bul týraly Oqý-aǵartý mınıstrliginiń «Balalardy erte damytý ınstıtýty» RMM dırektory Manara Adamova aıtty, dep habarlaıdy QazAqparat.

Mınıstrlik mádimetine qaraǵanda, Qazaqstanda 11 myń 104 mektepke deıingi uıymda 1,1 mln-nan astam bala qamtylyp otyr. Sonyń arasynda balabaqshalardyń 70 paıyzǵa jýyǵy qazaq tilinde oqytyp jatyr.

Qalǵan 30 paıyzy aralas balabaqsha bolyp sanalady.

«Balabaqshalarda qazaq tilinde bilim alýǵa qatysty suranys artyp keledi. Ásirese, jas ata-analar jaǵynan suranys kóbeıip keledi. 2022 jyly jańa oqý baǵdarlamasy engizilgen edi. Onda ár jastaǵy toptarǵa arnalǵan tıisti norma eskerilgen», - dedi M. Adamova Ortalyq kommýnıkatsııalar qyzmetindegi baspasóz máslıhatynda

QR Oqý-aǵartý mınıstrliginiń Mektepke deıingi bilim departamentiniń dırektory Natalıa Jumadildaeva byltyr ashylǵan balabaqshalardyń 98 paıyzy qazaq tilinde bilim berip jatqanyn aıtty,

«Osy oraıda qazaq tilinde oqytatyn bilim berý uıymdaryna suranys artyp keledi. Eger bala kishkentaıynan qazaq tilindegi sózderdi meńgere bastasa, onda ol otbasyndaǵy basqa da adamdarǵa yqpal etetini belgili», - dedi departament basshysy.

Budan buryn habarlanǵandaı, mektepke deıingi bilim berý uıymdarynda 97 408 pedagog jumys istep júr. Onyń ishinde aýyldarda 41 596 (42,7%), al qalada 55 811 (57,3%) adam qamtylǵan.

Elimizdegi mektepke deıingi uıymdardyń 70 paıyzǵa jýyǵy qazaq tilinde bilim berip jatyr.

Keıingi 4 jylda balabaqsha kezeginde turǵandar sany eki esege azaıdy.