Qazaq tilin jetik bilmesem de qyzym týǵan tilinde taza sóıleıdi - Dınara Sháıjúnisova
ASTANA. QazAqparat - "Astana Media Week" aptalyǵy aıasyndaǵy sessııada "Bolashaq" korporatıvti qorynyń dırektory Dınara Sháıjúnisova sheteldik fılmder men mýltfılmderdi qazaq tilinde dýblıajdaý jaıyn qozǵady.
Qor basshysy osy ispen ne úshin aınalysyp jatqanyn aıtqanda kóz jasyn da jasyrmady, dep xabarlaıdy QazAqparat tilshisi.
"Men ózim Qazaqstan jerinde týǵan joqpyn. Sodan bolar, týǵan tilimde jetik sóıleı almaımyn. Biraq balalarymnyń ana tilinde sóılegenin qaladym. Baıqap qarasam, balalardyń bári Disney mýltfılmderin jaqsy kóredi. Sóıtip, ol týyndylardy qazaq tilinde dýblıajdaý bastamasy qolǵa alyndy. Qazir kishkentaı qyzym týǵan tilinde taza sóılep júr. Sondyqtan teledıdarda qazaq tilinde dýblıajdalǵan fılmderdi kóptep kórsetý kerek", - deıdi Sháıjúnisova.
Onyń aıtýynsha, "Bolashaq" korporatıvti qory sheteldik fılmderdi dýblıajdaýdan tabys kórip jatqan joq. Onyń bastapqy maqsaty - shalǵaı jatqan aýyldaǵy árbir qazaq balasyna álemniń úzdik týyndylaryn týǵan tilinde jetkizý. Osy ýaqytqa deıin 23 fılm qazaq tiline aýdaryldy. "Qazir óz elimizdegi qazaqtar ǵana emes, sheteldegi mıllıondaǵan qandastarymyz ol týyndylardy kórip keledi. Al qazaqtyń júzdegen akteriniń daýysy Disney-diń bazasyna endi. Gúlnáz Áýezbaı, Azamat Qanapııa, Berik Aıtjan syndy ártisterimiz Djonı Dep, Anjelına Djolı pen Ýıll Smıtterdi qazaq tilinde sóılete bildi. Olar álemge tanymal Gollıvýd akterlerin jeti jyl boıy dýblıajdaýǵa múmkindik aldy", - dep atap kórsetti qor basshysy.
Aıta ketken jón, aǵymdaǵy jylda "Bolashaq" korporatıvti qorynyń bastamasymen bes týyndy qazaq tiline aýdaryldy. "23 qarasha "Kokonyń qupııasy" degen taǵy bir mýltfılm shyǵady. Ondaǵy aýdarma ǵana emes, stsenarııdiń tabıǵaty da qazaqqa jaqyn. Mýltfılmde qazaq xalqynyń qundylyqtaryn, táńirshildikti de anyq baıqaýǵa bolady", - deıdi Dınara Sháıjúnisova.
