Qazaq tilin jappaı jáne tegin oqytatyn kýrstar sanyn arttyrý qajet - fılologııa ǵylymdarynyń kandıdaty L. Qundaqbaı
ALMATY. Shildeniń 23-i. QazAqparat /Názıra Eleýhan/ - Elimizde búgingi tańda memlekettik til máselesi, jalpy til saıasaty - memlekettik saıasattyń mańyzdy bóligine aınalyp otyr. «Til taǵdyry - el taǵdyry» ekendigin barsha qazaqstandyqtar túsinistikpen qabyldaýda,
ózderi týyp ósip, órken jaıyp otyrǵan eldiń, jerdiń, memlekettiń memlekettik tiline nazar aýdaryp, sol tildi úırene bastaýy osynyń aıǵaǵy. Bul týraly búgin Almatyda «Qazirgi qazaqstandaǵy - polılıngvıstıka» degen taqyrypta ótken "dóńgelek ústel" otyrysynda fılologııa ǵylymdarynyń kandıdaty Láılá Qundaqbaı aıtty, dep habarlaıdy QazAqparat.
Onyń aıtýynsha, oǵan dálel ózge ult ókilderiniń qazaq tilin asa joǵary yqylaspen úırenýi jáne qazaqstandyqtardyń sózden iske kóship, elimizde tilge qatysty túrli is-sharalardyń úzdiksiz ótkizilip jatqandyǵy.
«Qazaq tiliniń oqytýshysy retinde ózge ult ókilderiniń qazaq tiline degen kózqarasynyń, ony úırenýge degen yqylasyn kórip qýanýdamyn. Osy oraıda, memleketimiz elimizdegi ózge ult ókilderiniń memlekettik tilge degen yqylas-yntasynyń artyp otyrǵan kezinde, qazaq tilin úıretý máselesinde, kezindegi Keńes Úkimetiniń «jappaı saýat ashý saıasatyndaı» saıasat ustanyp, qazaq tilin jappaı jáne tegin oqytatyn kýrstar sanyn arttyra tússe, nátıjeli iske qol jetkizerimiz anyq dep oılaımyn», dedi ol.
L.Shegebaıqyzynyń aıtýynsha, qazirgi ýaqytta quzyrly mekemelerdiń qyzmetkerleri memlekettik tildi úıretetin kýrstar men til ortalyqtaryn izdep jantalasa bastaýda. «Olardyń jarnamalarǵa kóńil bólip, ınternet aqtarýyn on toǵyz jyldan beri qatyp turǵan seńniń ornynan qozǵalǵany dep bilemin», dep atap ótti ol.
Ol sonymen qatar, aldaǵy ýaqyttarda barlyq oqý oryndarynda mýltımedııalyq kabınetterge qol jetkize alatyndaı jaǵdaı týyndasa, mýltımedııalyq baǵdarlamalardy qoldana alsa, nur ústine nur bolar edi», dep óz pikirin bildirdi.
