Qazaq tilin úıretýshilerdiń mártebesin, statýsyn, deńgeıin qalyptastyrý qajet - B.Omarov
STANA. Shildeniń 15-i. QazAqparat /Marlan Jıembaı/ - Qazaq tilin úıretýshilerdiń mártebesin, statýsyn, deńgeıin qalyptastyrý qajet. Bul pikirdi búgin elordada ótip jatqan «Memlekettik tildi úıretýdiń ǵylymı jáne ádistemelik máseleleri» atty respýblıkalyq ǵylymı-praktıkalyq semınar barysynda Til komıtetiniń tóraǵasy Baýyrjan Omarov bildirdi.
Alqaly jıyn barysynda sońǵy ýaqyttarda memlekettik tildi úırenýshilerge qajetti oqý ádistemelik quraldardyń, ádebıetterdiń, ádistemelikterdiń jetkilikti ekendigin atap ótken ol bul salada túıini sheshilmegen birqatar máselelerdiń de bar ekendigine toqtaldy. Bul oraıda komıtet tóraǵasy semınarǵa qatysýshylar qazaq tilin úıretýshilerdiń mártebesin, statýsyn, deńgeıin, jalpy qoǵamdyq ornyn qalyptastyrý máselesin kóbirek qozǵaǵandyqtaryn qalaıtyndyǵyn jetkizdi. «JOO-nyń turaqty mártebesi bar. Sonymen qatar mektep muǵalimderine de belgili túsinik qalyptasqan. Al til úıretetin oqytýshylardyń mártebesi, qoǵamdaǵy orny áli aıqyndalmaı jatqan sııaqty kórinedi. Sol sebepti búgin bul pedagogtar tobyna belgili bir dárejede sanattar ne bolmasa kategorııalar berýge bola ma, tildik tulǵasyn qalaı qalyptasyrýǵa bolady, olardyń qoǵamdaǵy ornyn, bedelin kóterý úshin qandaı sharalar iske asyra alamyz degen máseleler talqylansa. Qorytyndysynda sizderdiń taraptaryńyzdan jaqsy usynystar aıtylǵanyn qalar edik», dedi B.Omarov.
Sonymen qatar ol qatysýshylardan ózderiniń jumystarynda paıdalanyp júrgen ne bolmasa paıdalanǵaly júrgen usynystaryn, buryn jarııalanbaǵan ádistemelik ádebıetterin, salalyq termınderin, tyń baǵytpen oqytatyn quraldaryn, kompıýterlik baǵdarlamalardyń nusqalaryn komıtetke usynýǵa keńes berdi. «Til komıtetinde buǵan arnaıy bıýdjettik baǵdarlamada qarajat qarastyrylǵan. Biz olardy saraptap qaraı kele shyǵaryp berýge ázirmiz», dep qorytty sózin ol.
