Qazaq tilin óziniń kásiptik deńgeıiniń dárejesinde bilýge tıis mamandyqtardyń tizimi jasalmasa, bul baǵdarlamadan eshteńe shyqpaıdy - A.Smaıyl
ASTANA. Qyrkúıektiń 3-i. QazAqparat /Marlan Jıembaı/ - Qazaq tilin óziniń kásiptik deńgeıiniń dárejesinde bilýge tıis mamandyqtardyń tizimi jasalmasa, bul baǵdarlamadan eshteńe shyqpaıdy. Bul pikirdi búgin elorda ákimdiginde Tilderdi qoldaný men damytýdyń 2011-2020 jyldarǵa arnalǵan memlekettik baǵdarlama jobasyn qoǵamdyq talqylaýda QR Parlamenti Májilisiniń depýtaty Aldan Smaıyl bildirdi.
Baǵdarlamada normatıvtik-quqyqtyq bazany jetildirý jóninde aıtylǵandyǵyn tilge tıek etken depýtattyń sózine qaraǵanda, qoldanystaǵy elimizdiń «Til týraly» zańyna ózgerister men tolyqtyrýlar engizý máselesi 1998-2001 jáne 2001-2010 jyldarǵa arnalǵan baǵdarlamalarda da jaqsy aıtylyp, Elbasy qol qoıǵan tujyrymdamada da ótkir kóterilgen. «Biz osy jyldardyń ishinde qoldanystaǵy «Til týraly» zańnyń 23-shi babyn ózgertýge usynys jasadyq. Alaıda buǵan Mádenıet mınıstrligi de, Parlament depýtattary da kiriskenimen áli kúnge deıin tolyqtyrýlar men ózgertýler engizilgen joq», dedi.
Bul qazaq tilin óziniń kásiptik deńgeıiniń dárejesinde bilýge tıis mamandyqtardy aıqyndaý ekendigin aıtqan halyq qalaýlysy «ol bılet satatyn kassırden bastap, elmen jıi aralasatyn qyzmetterde otyrǵan sheneýnikterge «aınalaıyn qazaq tilin ózińniń deńgeıińde bilshi» degen ǵana talap. Sol áli kúnge deıin oryndalmaı, tizim jasalmady. Naq osynyń kesirinen qazaq tili bizdiń qoǵamǵa, ómirimizge engen joq. Eger sol tizim jasalmaıtyn bolsa, myna baǵdarlamadan eshteńe shyqpaıdy. Biz sol zańdy qashan ózgertemiz, qashan tolyqtyramyz? Eń keregi osy bolatyn jáne bul zańdardy túzeıtin baǵdarlama bolýy kerek», dedi.
A.Smaıyldyń paıymynsha, 23-shi bapty ózgertetin bolsaq, soǵan sáıkes birqatar zańdar bir mezette avtomatty ózgerýi kerek. Sonymen qatar 1 jyldyń ishinde zańdardy túzep, qalǵan 9 jylda soǵan oraı baǵdarlamadaǵy talaptardy, mindetterdi júzege asyrýymyz qajet. Al Úkimet 2011 jyly Parlamentke túzetilýi tıis zańdardy túgel ákelýi tıis. «Myna baǵdrlamada solaı jazylýy kerek edi jáne normatıvtik-quqyqtyq baza degen jalpylama sóz emes til jónindegi zańnyń osyndaı baptaryn, taǵy da basqa zańdardyń atyn atap, túsin tústep turyp kórsetýi kerek edi», dep túıindedi sózin Májilis depýtaty.
