Qazaq tilin óz betimen úırenemin deýshiler úshin oryssha-qazaqsha kópsalalyq tilashar basyp shyǵaryldy
TANA. 16 qyrkúıek. QazAqparat /Gúlmıra Alıakparova/ - Búgin Astanada oryssha-qazaqsha kópsalalyq tilashardyń tusaýy kesildi.
QR Mádenıet mınıstrligi Til komıtetiniń tóraǵasy Sherýbaı Qurmanbaıuly atap kórsetkendeı, memlekettik tildi óz betinshe úırenýge arnalǵan tilasharlar Qazaqstandyq azamattar eń kóp qyzmet etetin jáne kúndelikti ómirde jıi kezdesetin 10 salany qamtıdy. Olar - «Dastarqan», «Densaýlyq», «Saıahat», «Kásip», «Saýda», «Sport», «Qyzmet», «Shańyraq», «Mádenıet», «Bilim».
Tildeskishter azamattardyń qazaq tilin úırenýge qajettilik suranysyn qanaǵattandyrý úshin QR Mádenıet mınıstrliginiń tapsyrysy boıynsha Tilderdi damytý men qoldanýdyń 2011-2020 jyldarǵa arnalǵan memlekettik baǵdarlamasy aıasynda ázirlenip, shyǵaryldy. Árqaısysy 40-50 betten turatyn 10 kitapshada kúndelikti qarym-qatynasta jıi qoldanylatyn aýyzeki sóıleý úlgileri, qajetti sózder men sóz tirkesteri berilgen.
«Tildeskishterdiń eń qolaıly jaǵy olar óte yqsham jáne kórkem bezendirilgen, qaltaǵa salyp, ózimen birge alyp júrýge yńǵaıly. Ekinshi ereksheligi, tildeskishterdiń ishinde sózdiń, sóz tirkestiń, sóılemniń dybystalýyn tyńdaýǵa bolatyn CD dıskiler bar», - dedi Sh.Qurmanbaıuly.
Málim bolǵandaı, 1 mıllıon danamen shyqqan tilasharlar dúken sórelerine túspeıdi. Olar Qazaqstannyń barlyq oblystary men Astana jáne Almaty qalalaryndaǵy tilderdi damytý basqarmalaryna joldanyp, odan ári bilim berý, densaýlyq saqtaý, mádenıet, sport, halyqqa qyzmet kórsetý uıymdaryna taratylatyn bolady.
Til komıtetiniń tóraǵasy anyqtap bergendeı, tilasharlardy qyzyǵýshylyq tanytqan ár azamat Tilderdi damytý basqarmasyna tapsyrys berý arqyly ala alady.
