Qazaq tilin órkendetý óz qolymyzda, ásirese, jas urpaqtyń qajyry men qaıratynda - I.Tasmaǵambetov
ASTANA. Qyrkúıektiń 21-i. QazAqparat /Gúlmıra Álıakparova/ - «Qazaq tilin órkendetý óz qolymyzda, ásirese, jas urpaqtyń qajyry men qaıratynda», delingen Astana qalasynyń ákimi Imanǵalı Tasmaǵambetovtyń búgin,
bas qalada ótken «Tili birdiń - tilegi bir» atty memlekettik tildi jetik meńgergen ózge ult jastarynyń respýblıkalyq forýmy qatysýshylaryna arnalǵan hatynda.
Quttyqtaý hatty Astana qalalyq Tilderdi damytý basqarmasynyń bastyǵy Orazkúl Asanǵazy oqydy.
«Qazirgi tańda qazaq tiliniń taǵdyry kópshilikti tolǵandyryp júrgen úlken máselelerdiń biri. Osyndaı keleli máselege elimizdiń ózge ult jastarynyń atsalysýy bizdi qýantady. Qashanda bastamashyl, jigerli, jasampaz jastardan usynys-tilekter men alymdy oı barymdasyn kútemiz. Ásirese, tilegi bir jastardyń ótkir de ózekti pikirleri orys tildi qazaq jastaryna oı salady. Elimizdiń Prezıdenti N.Nazarbaevtyń Qazaqstan halqy Assambleıasynyń 14-shi sessııasynda belgilengen mindetterin oryndaý maqsatynda ótkizilip otyrǵan forýmnyń jumysy sátti de tabysty bolsyn. Elbasy barsha qazaqstandyqtardy biriktirýdiń asa mańyzdy faktory retinde memlekettik tildi atap kórsetip, qazaq tili úsh tildiń bireýi bolyp qalmaıtyny, úsh tildiń birinshisi, negizgisi, bastysy, mańyzdysy bola beredi», delingen onda.
I.Tasmaǵambetovtyń pikirinshe, bul másele barshany oılandyrý kerek jáne bul salaǵa ár azamat atsalysýy qajet.
«Qazaq tilin órkendetý óz qolymyzda, ásirese, jas urpaqtyń qajyry men qaıratynda. Búgingi jıynda til janashyrlary, elshil, otanshyl jastar ońtaıly sheshim qabyldap, memlekettik tildiń mártebesin kóterýde taǵy bir qadap alǵa basady dep oılaımyn», - degen óz quttyqtaýynda qala basshysy.
