Qazaq tilin nasıhattaǵany úshin jýrnalıstik syılyqtar tapsyryldy - Memlekettik tildi damytý Prezıdenttik qory
ASTANA. Maýsymnyń 25-i. QazAqparat - Memlekettik tildi damytý Prezıdenttik qory qazaq tilin nasıhattaǵany úshin jýrnalıstik syılyqtardy tapsyrdy, dep habarlady qordyń baspasóz qyzmeti.
Memlekettik tildi damytý Prezıdenttik qory Jýrnalıstıka kúni qarsańynda qazaq tilin nasıhattaýǵa qosqan úlesi úshin arnaıy syılyq taǵaıyndady.
Bul marapattyń maqsaty - Qazaqstanda tildik úderisterdi jan-jaqty jáne shynaıy jarııalap, qazaq tiliniń qundylyǵy men mańyzy týraly qyzyqty materıaldar jasaǵan, kásiptik qyzmetinde qazaq tilin jetik ıgergen baspasóz jáne elektrondyq BAQ qyzmetkerlerin kótermeleý.
Qordyń 50 myń teńge mólsherindegi birinshi úsh aqshalaı syılyǵyna «Ana tili» gazeti bas redaktorynyń birinshi orynbasary Erjan Baıtiles, «Kazahstanskaıa pravda» gazeti bas redaktorynyń orynbasary Sábıt Maldybaev, sondaı-aq Shyǵys Qazaqstan oblystyq «Rýdnyı Altaı» gazetiniń tilshisi Qabdylqaıyr Qudaıbergenov ıe boldy.
Qor dırektory Azat Sháýeevtiń aıtýynsha, Prezıdenttik qordyń jańa jýrnalıstik syılyǵy jyl saıyn aımaqtyq basylymdar men ınternet-BAQ-ty qosa alǵanda, orys jáne qazaq tilinde shyǵatyn barlyq qazaqstandyq buqaralyq aqparat quraldaryna monıtorıng negizinde beriletin bolady.
