Qazaq tilin meńgerýdiń úlgileri men ınnovatsııalyq ádisteri týraly eń úzdik maqala avtoryna altyn quıma beriledi
ALMATY. 2 sáýir. QazAqparat - Búgin Almatyda memlekettik tildi meńgerýdiń úlgileri men ınnovatsııalyq ádisteri týraly eń úzdik maqalalarǵa baıqaý jarııalandy.
Qazaqstandyq buqaralyq aqparat quraldary men blogerler arasyndaǵy bul sharany «Arnaý» til mádenıetin damytý ortalyǵy Qazaqstan Medıa Alıansynyń aqparattyq qoldaýymen uıymdastyryp otyr. Júlde qory - 1 mıllıon teńge. Saıystyń jeńimpazy 50 gramm altyn quımasyna ıe bolady. Dástúrli túrde ótkizip otyrý josparlanǵan baıqaýdyń basty maqsaty - jýrnalıster men blogerlerdi qazaq tili men ony meńgerýdiń nátıjeli ádisterin Qazaqstan halqyna túsindirýge ýájdeý.
«BAQ til men ony meńgerýge degen jaǵymdy jáne syndarly kózqaras qalyptastyrýda negizgi ról atqarady. Memlekettik, orys jáne aǵylshyn tilderin jetik biletin tabysty qazaqstandyq azamat modelin alǵa bastyrý kerek», - deıdi «Arnaý» ortalyǵynyń bas dırektory Dana Jaqypova.
Onyń aıtýynsha, saıys «Baspasózdegi úzdik maqala», «On-line BAQ-taǵy úzdik maqala»,«Úzdik blogjazba»,«Úzdik vıdeosıýjet»,«Úzdik fotoreportaj» atalymdary boıynsha ótedi. Budan bólek, júlde qory Qazaqstannyń isker tulǵalary atynan tabystalatyn ataýly syılyqtarmen tolyqtyrylyp otyr.
Baıqaýǵa qazaq jáne orys tilderinde 1 naýryz ben 1 qarasha aralyǵynda jarııalanǵan nemese efırge shyqqan jumystar qabyldanady. Onda myna taqyryptar qamtylý kerek - Qazaq tilin meńgerýdegi jańa qyzyqty ádister. Qazaq tilin úırenýdiń tabysty úlgisi. Áıgili adamdar - qazaq tilin úıretýge zor úlesin qosqan oqytýshylar, jattyqtyrýshylar. Tabysty úlgiler - qazaq tilin jetik meńgerip alǵan adamdar. Úzdik tájirıbeler men noý-haý - qazaq tilin tek úırený emes, sonymen birge, tájirıbede qoldaný.
Úmitkerler jumystaryn «Jumys_ataýy» degen taqyryppen konkurs @ arnau . kz elektrondy mekenjaıyna jiberý kerek. Baıqaý týraly tolyq maǵlumatty - www.arnau.kz saıtynan bilýge bolady.
