Qazaq tilin qoldaný aıasyn keńeıtý, BAQ-tardaǵy úlesin arttyrý máselesi basty nazarda bolýy tıis - Kárim Másimov
ASTANA. Shildeniń 26-sy. QazAqparat /Rýslan Ǵabbasov/ - Til máselesi turǵysynda tabystarymyz az emes, biraq áli kúnge deıin sheshilmegen máseleler jetkilikti.
Bul týraly búgin Astanada Úkimet basshysy Kárim Másimov Tilderdi qoldaný men damytýdyń 2011-2020 jyldarǵa arnalǵan memlekettik baǵdarlamasynyń jobasyn talqylaýǵa arnalǵan keńeıtilgen otyrysta aıtty.
«Til-elimiz táýelsizdigin alǵannan bergi eń kóp talqylanǵan másele. Elbasynyń únemi qoldaýynyń arqasynda memlekettik tildi damytýda aıtarlyqtaı tabystarǵa qol jetkizdik»,- dedi Úkimet basshysy.
K. Másimovtiń sózine qaraǵanda, 18 jyldyń ishinde qazaq mektepterinde oqıtyn balalardyń sany 510 myńǵa oqýshyǵa artty. Osy turǵyda ol táýelsizdik jyldary barlyq memlekettik organdardaǵy is-qaǵazdar qazaq tiline kóshirilgenin, sondaı-aq BAQ-taǵy memlekettik tildiń úlesi artqanyn aıtyp ótti.
«Tabystarymyz az emes, biraq áli kúnge deıin sheshilmegen máseleler jetkilikti. Búgingi talqylaýǵa usynylǵan baǵadarlama osy problemalardy sheshýge arnalǵan. Menińshe, baǵdarlama óte sapaly ári jan-jaqty júıeli jasalǵan. Baǵdarlamanyń eń jaqsy jetistigi dep memlekettik tildi balabaqsha, orta mektep jáne joǵary oqý oryndarynda úzdiksiz oqytý men barlyq maqsatty aýdıtorııanyń qamtylýy dep aıtýǵa bolady»,-dedi Úkimet basshysy.
Premer-Mınıstrdiń paıymdaýynsha, baǵdarlamada qamtylǵan qazaq tilin qoldaný aıasyn keńeıtý, ony buqaralyq aqparat quraldaryndaǵy úlesin arttyrý máselesi basty nazarda bolýy tıis. «Men memlekettik termınologııa komıssııasynyń mártebesin kóterý, onomastıka salasyndaǵy qordalanǵan problemalardy sheshý jónindegi usynystardy tolyq qoldaımyn»,- dedi K. Másimov.
Úkimet basshysynyń pikirinshe, orys tilin qoldaný aıasyn saqtaý, aǵylshyn jáne basqa shetel tilderin úırený, sondaı-aq az ul ókilderine óz ana tilin oqyp, úırenýge jaǵdaı jasaý óte oryndy. «Birneshe shetel tilderin bilý - búgingi zaman talaby. Osyny ózimiz de umytpaýymyz kerek»,- dedi Premer-Mınıstr.
K. Másimovtiń aıtýynsha, endigi maqsat osy baǵdarlamada kórsetilgen barlyq mindetterdi ret-retimen, kezeń-kezeńimen júzege asyrý. Ol úshin baǵdarlamany oryndaýdyń naqty josparyn jasaý qajet. Onda barlyq sharalardyń naqty merzimi kórsetilip, jaýapty memlekettik organdardy belgileý kerek. Baǵdarlama aıasynda jasalatyn zań jobalary Parlament depýtattary, «Nur Otan» partııasy, zııaly qaýym ókilderi, mamandar men til janashyrlarynyń qatysýymen jasalýy tıis.
