Qazaq tili Vıkıpedıadaǵy tilder reıtıngisinde 125-orynnan 38-orynǵa kóterildi
ASTANA. 21 jeltoqsan. QazAqparat - Qazaq tili Vıkıpedıadaǵy tilder reıtıngisinde 125-orynnan 38-orynǵa kóterilip, maqala sany 100 myńnan asatyn "jetik" dep tanylǵan 40 tildiń qataryna kirdi,
dep habarlaıdy QR Premer-Mınıstriniń pm.kz saıty.
«Bul joba 2011 jyldyń maýsym aıynda qolǵa alyndy. Sodan beri Vıkıpedııa entsıklopedııasynyń qazaq tilindegi bólimindegi maqalalardyń sany 10 esege ósip, 100 myńnan asty. Qazaqsha maqalalar jazatyn jáne óńdeıtin erikti redaktorlar sany da 4 adamnan 250 adamǵa jetip otyr. Osynyń arqasynda qazaq tili Vıkıpedıadaǵy tilder reıtıngisinde 125-orynnan 38-orynǵa deıin kóterilip, maqala sany 100 myńnan asatyn "jetik" dep tanylǵan 40 tildiń qataryna kirdi», - dep jazady saıt.
Qazirgi tańda Qazaq Vıkıpedııasyndaǵy maqalalardyń sany 125 myńnan asady.
Bul aralyq nátıje dúnıejúzilik entsıklopedııanyń tildik taraýlarynyń ishindegi úzdik jetistik dep tanylyp otyr. Tamyz aıynda Izraıldiń Haıfa qalasynda ótken «Wikimania-2011» konferentsııasynyń qorytyndysy boıynsha qazaqstandyq «WikiBilim» qory «2011 jyldyń ǵalamdyq vıkıpedıashysy» ataǵyn ıelenip (Global Wikipedian of the Year), Vıkıpedıanyń negizin qalaýshy Djımmı Ýeılstiń (Jimmy Wales) arnaıy grantyn jeńip aldy.
Jobanyń maqsaty - Vıkıpedııa ǵalamdyq entsıklopedııasyndaǵy qazaqsha maqalalardyń sany men sapasyn ósirý jáne onlaın-saýattylyqty arttyrý.
