Qazaq tili rýhanııatymyzdyń, ulttyq bolmysymyzdyń, memlekettiligimizdiń, táýelsizdigimizdiń basty tiregi- respýblıkalyq basylymdarǵa sholý
ASTANA. Shildeniń 27-si. QazAqparat - QazAqparat agenttigi respýblıkalyq basylymdarda shildeniń 27-si, seısenbi kúni shyqqan ózekti materıaldarǵa sholýdy usynady.
***
«Egemen Qazaqstan» basylymy búgingi sanynyń qomaqty bóligin
keshe Mádenıet mınıstrligi daıyndap, Úkimette qaralǵan Tilderdi qoldaný men damytýdyń 2011-2020 jyldarǵa arnalǵan memlekettik baǵdarlamasynyń jobasyna arnapty. Basylymnyń jazýynsha, otyrys barysynda til barsha qazaqstandyqtardyń memlekettik
tili - qazaq tili rýhanııatymyzdyń, ulttyq bolmysymyzdyń, memlekettiligimizdiń, táýelsizdigimizdiń basty tiregi desek, memlekettik baǵdarlama jobasy eń áýeli memlekettik tildi on jyl merzimde
jan-jaqty damytýdyń negizgi baǵyt-baǵdaryn aıqyndaýǵa arnalǵandyǵy aıtyldy. Baǵdarlamanyń basty ereksheligi - ony ázirleý barysynda 30-dan astam sheteldiń til saıasaty men quqyqtyq retteý tájirıbesi zerdelenipti. Otyrysta jobamen óziniń jan-jaqty tanysqanyn aıtqan belgili qoǵam qaıratkeri Amangeldi Aıtaly atalmysh qujattyń tildiń ómirsheńdigin qamtamasyz etýde aıtarlyqtaı ról atqaratynyn, alaıda ony áli de bolsa jetildire túsý qajettigi jónindegi pikirin bildirgen. Atalmysh másele jóninde «Egemen Qazaqstan» basylymynyń búgingi sanyndaǵy «Tórteý túgel bolsa, til tórge ozady» atty maqaladan oqýǵa bolady.
Sondaı-aq basylym búgingi sanynda tamyz aıynyń 1-inen bastap, elimizdiń barlyq óńirlerinde «KEGOK» AQ-nyń júıeleri boıynsha elektr energııasyn taratýdyń biryńǵaı tarıfi engiziletin habarlaıdy. Tutynýshynyń qaı jerde turatyndyǵyna qaramastan Ulttyq elektr júıesine qosylý qashyqtyǵyna qaramastan, elektr qýatyn taratý tarıfi qosymsha qun salyǵynsyz biryńǵaı elektr energııasynyń
1 kVt/saǵatyna 0,94 teńge bolyp belgilendi. Bul týraly basylymnyń búgingi sanyndaǵy «Elektr qýatynyń biryńǵaı tarıfi belgilendi» atty maqaladan qanyǵýǵa bolady.
***
«Aıqyn»búgingi sanynda «Jastardyń saıası belsendiligin memleket kóterýi kerek pe» degen qyzyqty maqala jarııalapty. Maqala avtorynyń sarapshylardyń pikirlerine súıene otyryp jazǵandaryna qaraǵanda, qazirgi jastardyń kópshiligi saıasatqa qyzyqpaıdy ári qoǵamdy ómirge de aralasqysy joq. Jastardyń azamattyq pozıtsııasy da myǵym emes kórinedi. Alaıda ózimizdiń otandyq sarapshylar bul pikirmen tolyq kelispeıdi. Olardyń osy másele tóńiregindegi oı-pikirleri jóninde «Aıqynnyń» búgingi sanynan oqı alasyzdar.
«Qazaq halqy sońǵy bir ǵasyr aralyǵynda óziniń myń jyldyq tarıhı qundylyǵynan kóz jazyp qaldy. Tipti qazirgi qazaq keshegi óziniń ata-babasynyń myńdaǵan jyldar boıy Islam áleminde bedeldi ustazdyq ról atqaryp kelgeninen beıhabar kúı keshýde. Jalǵyz «kóktegi táńirge» tabynyp, álemge at oınatqan saqtar urpaǵy Islam dini kelgende sol dindi óz erkimen qabyldap, soǵan qasyq qany qalǵansha qaıratyn jumsap, musylman bolǵan shaqty da óz ishinen myńdaǵan Ál-Farabı sekildi ǵulamalar shyǵaryp, óz qanynyń ulyqtyǵyn álemge taǵy bir ret tanytty», deıdi teologııa ǵylymdarynyń doktory, Nur Múbárak Islam mádenıeti ýnıversıtetiniń professory Muhıtdın Isauly «Aıqyn» basylymynyń tilshisine bergen suhbatynda. Ǵalymnyń osy máselege qatysty pikirlerin basylymnyń búgingi sanyndaǵy «Barlyq saıasattyń da, mádenıettiń de ózegi - dinde» atty suhbattan oqýǵa bolady.
***
«Táýelsiz elimizdiń aqparattyq keńistigin qamtamasyz etý úshin shetelden keletin aqparattyq tasqynǵa belgili bir mólsherde tosqaýyl qoıýymyz kerek. Ashyq qoǵam quryp, ózin demokratııalyq memleket sanaıtyn batys elderiniń BAQ týraly sheteldik ónimderdiń 20 paıyzdan aspaýyn qadaǵalaıtyn arnaıy baptar bar. Álemniń kóptegen elinde osy dástúr saqtalǵan», deıdi L.Gýmılev atyndaǵy EUÝ-niń Jýrnalıstıka jáne saıasattaný fakýltetiniń dekany Namazaly Omashev. Al Qazaqstan gýmanıtarlyq-saıası konıýnktýra ortalyǵynyń prezıdenti Esenjol Alııarovtyń paıymdaýynsha, bas salyp barlyq sheteldik telearnalardy jaýyp tastaý durys emes.
Bul máselege qatysty ózge de sala mamandarynyń pikirlerin «Alash aınasy» basylymynyń búgingi sanyndaǵy «Aqparattyq qaýipsizdikti qamtamasyz etý úshin sheteldik telearnalarǵa shekteý qoıý kerek pe?» atty maqaladan oqýǵa bolady.
Sondaı-aq osy basylymnyń jazýynsha, aldaǵy táýlikterde Qazaqstannyń shyǵys aımaǵynyń biraz bóliginde jaýyn jaýyp, uıytqyp jel soǵady. Al elimizdiń qalǵan óńirlerinde antıtsıklon taraıdy dep kútilýde. Bul týraly basylymnyń búgingi sanyndaǵy «Aptap ystyq kele jatyr» atty maqalada.
***
«Kazahstanskaıa pravda» basylymynyń jazýynsha, Qazaqstan Respýblıkasy Prezıdenti janyndaǵy Memlekettik basqarý akademııasy Qazaqstannyń memlekettik qyzmetkerlerin daıyndaý úshin 60 myń eýro bólý týraly Frantsııanyń «Total» munaı-gaz kompanııasymen arnaıy kelisimge qol qoıdy. Qujattyń maqsat-mindetteri men onyń iske asyrylý jaıy jóninde basylymnyń búgingi sanyndaǵy «Investıtsıı v ıntellektýalnyı potentsıal» atty maqaladan bilesizder.
