Qazaq tili men ádebıeti páni boıynsha shetelde turatyn qazaq dıasporalaryna arnalǵan X Halyqaralyq olımpıadasy ótkiziledi

ASTANA. 24 maýsym. QazAqparat - Shetelde turatyn qazaq dıasporasynyń erekshe daryndy balalaryn anyqtaý jáne olarǵa qoldaý kórsetý maqsatynda Qazaqstan Respýblıkasynyń Bilim jáne ǵylym mınıstrligi, «Daryn» respýblıkalyq ǵylymı-praktıkalyq ortalyǵy, «Qazaqstan» TRK jáne Memlekettik tildi damytý Prezıdenttik qorynyń qoldaýymen aǵymdaǵy jyldyń 24-28 maýsymynda Qazaq Ulttyq óner ýnıversıtetiniń bazasynda «Qazaqstan - ata jurtym, qasıetim - ana tilim» atty qazaq tili men ádebıeti páni boıynsha qazaq dıasporalaryna arnalǵan X Halyqaralyq olımpıadasyn ótkizedi.

Bul týraly QR BǴM «Daryn» respýblıkalyq ǵylymı-praktıkalyq ortalyǵynyń baspasóz qyzmetinen habarlady.

Olımpıadanyń negizgi maqsaty qazaq dıasporasy balalarynyń ana tili, qazaq ádebıeti, Qazaqstan tarıhy, mádenıeti men óneri boıynsha tanymdyq qabiletin damytý, álemniń ár elderinde turatyn qazaq jastarynyń dostyq baılanystaryna yqpal etý, qazaq dıasporasy ókilderi arasynda qazaq tilin meńgerý, mádenıetiniń deńgeıin kóterý jáne elimizdiń tarıhyna, Qazaqstannyń qazirgi damýyna qyzyǵýshylyqtaryn arttyrý bolyp tabylady.

Olımpıadaǵa Germanııa, Avstrııa, Gollandııa, Vengrııa, Túrkııa, Ózbekstan, Qyrǵyzstan, Túrkmenstan, Mońǵolııa, Qytaı, Reseı Federatsııasynyń Máskeý, Omby jáne Altaı ólkesi qurama komandalary keledi dep kútilýde.

Halyqaralyq olımpıada sheńberinde otandastarymyzdyń «Nur Otan», halyqtyq partııasy «Jas Otan» jastar qanatymen, qoǵam qaıratkerleri, halyq qalaýlylary aqyn-jazýshylarmen kezdesý, Qazaq drama teatrynyń spektaklin tamashalaý jáne tarıhı eskertkishterge saıahattar jasaý josparlanǵan.

Olımpıadanyń jeńimpazdary I, II, III dárejeli dıplomdarmen, gramotalarmen marapattalady.

Olımpıadanyń ashylýy 2013 jylǵy 25 maýsymda saǵat 11.00-de, jabylýy 2013 jyldyń 28 maýsymynda saǵat 11.30-da Qazaq Ulttyq óner ýnıversıtetiniń kontsert zalynda ótedi.