Qazaq tili Majarstanda tanymaldylyqqa ıe bolýda

ASTANA. QazAqparat - Qazaqstan Respýblıkasynyń elshisi Nurbaq Rústemov jyl saıyn qazaq, orys, mońǵol jáne belorýs tilderi kýrsyn uıymdastyratyn Lakıtelek halyqaralyq ınstıtýtyna bardy. Qazaq tilin meńgerý toby vengrııalyq jastar arasynda joǵary suranysqa ıe. Uly dalanyń mádenıeti men ádet-ǵurpyna degen qyzyǵýshylyq jyl sanap artyp keledi, dep habarlaıdy Majarstandaǵy QR Elshiligi.

N.Rústemov Majarstan memlekettik jınalystar tóraǵasynyń orynbasary, ınstıtýt dırektory Shandor Lejak pen oqý ordasynyń stýdentterimen kezdesý barysynda zamanaýı Qazaqstannyń qalyptasýyndaǵy negizgi kezeńderi men Táýelsizdik jyldaryndaǵy eldiń basty jetistikteri týraly aıtty, sondaı-aq majarstandyq aýdıtorııany Memleket basshysy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasynyń negizgi aspektilerimen tanystyrdy.

Qazaqstandyq dıplomat bizdiń elimiz bilim jáne ǵylym  jahandyq júıesiniń ıntegratsııasy úshin, rýhanı birlikti qamtamasyz etý úshin qajet bolyp tabylatyn qazaq tilin latyn álipbıine kóshý jolynda turǵanyn atap ótti.

Budan bólek, ol Qazaqstan men Majarstan arasyndaǵy qatynastyń tyǵyz mádenı-gýmanıtarlyq baılanystyń arqasynda startegııalyq kezeńge ótkenin aıtty. 

Kezdesý barysynda Elshi bolashaqta qazaqstandyq joǵary oqý oryndarynda joǵary bilim alýdy josparlap júrgen stýdentterdiń qazaq halqynyń salt-dástúri týraly qoıǵan suraqtaryna jaýap berdi.

Buǵan qosa, aýdıtorııa nazaryna majar tilinde Qazaqstan týraly derekti fılm usynyldy. Sondaı-aq, Elshilik tarapynan qazaq tili, ádebıeti boıynsha oqý quraldary men sózdikter syıǵa berildi, al stýdentterge estelik syılyqtar syıǵa tartyldy.