Qazaq tili máselesin kóterýden jalyqpaýymyz kerek - N.Erimbetov
ASTANA. Maýsymnyń 23-i. QazAqparat /Gúlmıra Álıakparova/ - Qazaq tili máselesin kóterý esh toqtatylmaýy tıis. Bul týraly búgin Astanada «Qazaqstandaǵy tildik konsolıdatsııa: problemalary men keleshegi» taqyrybynda ótken dóńgelek ústelde Qazaqstan gýmanıtarlyq-saıası konıýktýra ortalyǵynyń vıtse-prezıdenti Nurlan Erimbetov aıtty.
«Bizde qazaq tilin meńgerý jáne onyń qoldanylý aıasyn keńeıtý máseleleri tym saıasılandyrylǵan. Ol 20 jyl boıy kóterilip kele jatsa da másele sheshimin tappaı otyr. Jaǵdaı tabıǵı úrdister, ıaǵnı qazaqtar sanynyń kóbeıýi men kóshi-qonnyń arqasynda ǵana sirese qatqan ornynan qozǵalyp keledi. Meniń oıymsha, til máselesinde saqtyq pen dıplomatııa kóp. Sondyqtan, bul taqyrypty kóterýden jalyqpaı onyń kiltin tabýǵa umtylý kerek», - dedi ol.
N.Erimbetovtyń aıtýynsha, eger memlekettik til - qajettilik tili bolmasa jáne ol óziniń fýnktsıonaldyq qyzmetin atqarmasa, onyń bolashaǵy bulyńǵyr. «Qazir adamdar qaltalarynan aqsha shyǵaryp turyp, ózge tilderdi meńgerip jatyr. Óıtkeni olar bul til oǵan jahandyq álemge jol ashyp, mansaptyq dárejemen kóterilýine septigin tıgizetinin biledi», - deıdi til janashyry.
Sondaı-aq N.Erimbetov, buqaralyq aqparat quraldaryndaǵy qazaq tiliniń jaǵdaıyn tilge tıek etip, mańyzdy aqparattardy qazaq tilinde birinshi bolyp estı almaǵan oqyrmandar men kórermender, ony basqa tilde izdeýge májbúr bolyp jatqandyǵyn aıtty.
Dóńgelek ústel jumysyna memlekettik, táýelsiz ǵylymı-zertteý jáne taldaý qurylymdarynyń sarapshylary, mádenıettanýshylar, til zertteýshileri, saıasattanýshylar men áleýmettanýshylar qatysty.
