Qazaq tili qoǵamdy biriktirýshi til bolýy tıis - dóńgelek ústel
ALMATY. 12 qyrkúıek. QazAqparat /Erbol Azanbek/ - Qazaqstandaǵy til saıasaty halyqty biriktirýshi faktor retinde kórinis tabýy tıis.
Bul týraly búgin Almatyda ótip jatqan «Qazaqstandaǵy til saıasatynyń ózekti máseleleri» atty dóńgelek ústel barysynda saıasattanýshy Erlan Saırov aıtty.
Onyń paıymdaýynsha, til máselesi qoǵamdy bólmeýi qajet. Eske sala keteıik, qazaq tiliniń memlekettegi alar orny týraly qoǵamda qyzý pikirtalastar týyndap otyrǵany belgili. «Alternatıva» aktýaldy zertteýler ortalyǵy uıymdastyrǵan búgingi dóńgelek ústel de osy taqyrypqa arnaldy.
Jıynǵa qatysqan sarapshylardyń birqatarynyń pikirlerinshe, qatań til saıasaty qoǵamda kereǵar pikir týdyrýy múmkin. Al birqatar sarapshylar qazaq tilin joǵary deńgeıge kóterýdi ylǵı keıinge shegere berý qajet emestigin aıtty. «Orys tili Keńestik memleketterdiń birkelki qoǵam retinde qalyptasý tili boldy, qazaq tili de memlekettik birkelkilikti qalyptastyratyn til bolýy tıis, bul máselege dál qazir nazar aýdarýymyz kerek», -dedi Almaty qalalyq tilderdi damytý basqarmasynyń tilderdi damytý jáne úılestirý bóliminiń bastyǵy Baqyt Qalymbet.
Jıyn qorytyndysy boıynsha jasalǵan birqatar usynystar quzyrly organdardyń nazaryna usynylatyn boldy.
