Qazaq tili elimizdegi ulttardy baılanystyratyn býyn bolýy qajet - sarapshy Saıyn Borbasov

ALMATY. Qarashanyń 26-sy. QazAqparat /Ádilet Musahaev/ - Búgin Almatyda Qazaqstan gýmanıtarlyq-saıası konıýnktýra ortalyǵy men QR Mádenıet jáne aqparat mınıstrligi birlesip,  «Qazaqstandaǵy etnostardy toptastyrý úderisindegi Qazaqstan halqy Assambleıasy janyndaǵy Ǵylymı-saraptamalyq keńestiń roli» taqyrybynda dóńgelek ústel ótkizdi,

  dep habarlaıdy QazAqparat.

         Shara barysynda Qazaqstannyń etnıkaaralyq keńistigindegi turaqtylyqty nyǵaıtý, respýblıkadaǵy etnostar arasyndaǵy ózara túsinistik pen tatýlyq, olardyń birtutas ultqa birigý máseleleri talqylandy. Sonymen qatar, qazirgi kúngi geoekonomıkalyq, geosaıası jaǵdaılarda polıetnıkalyq eldiń etnostaryn biriktirý, onyń memlekettiliginiń basty sharty bolyp tabylatyndyǵy da aıtyldy.

          Qazaqstan gýmanıtarlyq-saıası konıýnktýra ortalyǵynyń prezıdenti Esenjol Alııarovtyń aıtýynsha, osy máselelermen aınalysatyn uıymdardyń biri retinde Qazaqstan halqy Assambleıasy etnıkaaralyq kelisimdi nyǵaıtý jolynda aıtarlyqtaı úles qosyp kele jatyr. «Elimizdiń etnıkaaralyq keńistigindegi jumysyn úzdiksiz damytý qajet. Osyǵan oraı, Qazaqstan halqy Assambleıasynyń jumysyn odan ári jetildirýge jaqynda qurylǵan Ǵylymı-saraptamalyq keńestiń qosar úlesi zor bolmaq», deıdi E. Alııarov.

          Qazaqstan gýmanıtarlyq-saıası konıýnktýra ortalyǵynyń bas sarapshysy Saıyn Borbasovtyń aıtýynsha,  «qazirgi ýaqytta el halqynyń 66 paıyzy - qazaqtar, ıaǵnı 16 mıllıon halyqtyń 9,3 mıllıony. 20-30 jyldan keıin  bul kórsetkish 88 paıyzdy quraýy múmkin. Sondyqtan memleketimizdegi basqa ulttardyń qazaq tilinde sóılep,  úırenýine mán berýimiz kerek. Qazaq tili elimizdegi ulttardy baılanystyratyn býyn bolýy qajet».

         Jıynǵa Qazaqstan halqy Assambleıasynyń, onyń Ǵylymı-saraptamalyq keńesiniń ókilderi, elimizdegi memlekettik, táýelsiz ǵylymı-zertteý jáne taldaý qurylymdarynyń sarapshylary qatysty.