Qazaq tildi jańa ınternet-gazet ashyldy
ALMATY. 14 aqpan. QazAqparat /Erbol Turymbetov/ - Qazaq tildi ınternet basylymdardyń qatary taǵy bir qazaq tildi ınternet-gazetpen tolyqty. Búgin www.7kun.kz dep atalatyn jańa ınternet-basylym iske qosyldy.
Ǵalamtor basylymnyń bas redaktory Erbol Albannyń aıtýynsha, basylymdy ashý ınternet salasynyń qajettiligine oraı týyndaǵan. «Qazirgi tańda álemde ınternettený úrdisi qatty qarqynmen júrgizilýde. Bul úrdisten Qazaqstan da qalyp otyrǵan joq. Elimizde jyl sanap ǵalamtor paıdalanýshylardyń sany artyp otyr. Mysaly, 2010 jyldyń sońynda 4,3 mln. adamdy nemese elimizdiń turǵyndarynyń 26,5 paıyzyn qurady. Qazirgi kezde aýyl turǵyndarynyń basym bóliginiń ınternetke qosyla almaı otyrǵandyǵyn, bolashaqta olardyń qosylý múmkindigin eskersek, aldaǵy ýaqytta ony paıdalanýshylar sany artady. Sondyqtan ınternet-basylymdar, onyń ishinde qazaq tildi saıttar óte kerek. Bul qazirgi tańda Elbasynyń da, Úkimettiń de ustanyp otyrǵan saıasattarynyń biri. Osy baǵytta bir top jýrnalıst, blogshylar birige otyryp, osy basylymdy ashýdy jón kórdik», -deıdi ol.
Onyń sózine qaraǵanda, saıtta kúndelikti jańalyqtar, saraptama materıaldary, suhbattar berilip otyrylmaq. «Oqyrmandar materıaldardy birden latyn qarpine de aýystyryp oqı alady. Sondaı-aq oqyrmandardyń ózderine jańalyq qosý múmkindigi qarastyrylǵan. Sonymen qatar saıt materıaldary birneshe áleýmettik jelige birden jarııalanyp otyrylady», - deıdi E. Alban.
Sonymen qatar, bas redaktor jaqyn kúnderi shoý-bıznes, mádenıet salasyna arnalǵan «demalys.kz» aqparattyq, tanymdyq portalyn iske qosýdy josparlap otyrǵandaryn jetkizdi.
