Qazaq tildi tilshiler arasyndaǵy «Altyn qalam» IIІ shyǵarmashylyq baıqaýynyń jeńimpazdary anyqtaldy
ónerkásip taqyrybyna mamandanǵan qazaq jýrnalısteri arasyndaǵy «Altyn qalam» IIІ respýblıkalyq shyǵarmashylyq baıqaýynyń jeńimpazdaryn marapattaý rásimi ótti.
Qazaq jýrnalıstteri arasyndaǵy respýblıkalyq «Altyn qalam» shyǵarmashylyq baıqaýy úshinshi jyl qatarynan ótkizilýde. Baıqaý memlekettik tilge naqtyly qoldaý kórsetýge, qazaq tildi jýrnalısterdiń kásibı sheberligin arttyrýǵa, medıa-salada jańa ekonomıkalyq oılaýdy qalyptastyrýǵa baǵyttalǵan. Bul medıa-baıqaý ENRC kompanııasynyń BAQ-taǵy memlekettik tilge qoldaý kórsetý jónindegi strategııalyq baǵdarlamasynyń tabysty jobasy boldy.
Arnaıy qurylǵan ádilqazylar alqasynyń quramyna ENRC Kazakhstan prezıdentiniń bas keńesshisi Ibragım Edilbaev, «Egemen Qazaqstan» gazeti» AQ prezıdenti Saýytbek Abdrahmanov, QR Parlamenti Senatynyń depýtaty Eleýsin Saǵyndyqov pen bilim jáne ǵylym vıtse-mınıstri Murat Ábenov endi. Qazylar alqasy jýrnalısterdiń maqalalaryn taqyryp ózektiligi, aqparattyq jáne saraptamalyq tereńdigi syndy talaptar boıynsha baǵalady.
Respýblıkalyq BAQ-tardyń 7 jýrnalısi baıqaý laýreaty ataldy. Baıqaý qorytyndysy boıynsha, elimizdegi ındýstrııalyq-ınnovatsııalyq baǵdarlamasy aıasyndaǵy jobalardyń júzege asyrylýy jáne kásiporyndardyń turaqty damý baǵytyndaǵy jobalary týraly jazǵan maqalalary úshin «Egemen Qazaqstan» gazetiniń sholýshysy Suńǵat Álipbaı jeńimpaz dep tanylyp, 500 myń teńge kóleminde aqshalaı syılyqqa ıe boldy.
Ekinshi oryndy Pavlodar oblystyq «Saryarqa Samaly» gazeti bas redaktorynyń orynbasary Nurbol Jaıyqbaev pen «QTJ» UK» AQ buqaramen baılanys jáne ishki hattama departamentiniń menedjeri Eskendir Ertaev bólisip, árqaısysy 400 myń teńge kóleminde aqshalaı syıaqy aldy. Nurbol Jaıyqbaev «Qazaqstan elektrolız zaýyty» AQ jáne «Eýroazıattyq energetıkalyq korporatsııasy» AQ syndy Pavlodar oblysyndaǵy iri kásiporyndardyń ındýstrııalyq baǵdarlamalary týraly maqalalar jazǵan. Eskendir Ertaev QTJ qyzmetindegi jańa tehnologııalardyń engizilýi týraly «Qazaqstannyń ınnovatsııalyq joly» maqalasy úshin marapattaldy.
Úshinshi orynǵa «Qazaqstan» TRK telejúrgizýshisi Meıirjan Álıbekuly, «Túrkistan» gazetiniń tilshisi Gúlzına Bektasova men «Mańǵystaý» gazetiniń tilshisi Ábdiǵalym Sarkenov ıe boldy. Olardyń árqaısysyna 300 myń teńge kóleminde aqshalaı syılyq tabys etildi. Meıirjan Álıbekulyn «Batys Eýropa - Batys Qytaı» logıstıkalyq jobasy men Aqtóbe oblysyndaǵy ındýstrııalyq jáne áleýmettik jobalar týraly vıdeosıýjetter úshin atap ótti. Al Gúlzına Bektasovany Astananyń tehnologııalyq damýy jaıyndaǵy maqalalary úshin, Ábdiǵalym Sarkenovty Mańǵystaý oblysyndaǵy jańa munaı jobalary týraly maqalalary úshin marapattady.
Aqtóbe oblysyndaǵy «Kazhrom» TUK Hromtaý qalasynyń ekonomıkalyq damýyndaǵy úlesi týraly maqalasy úshin «Aqtóbe» gazeti ekonomıka bóliminiń meńgerýshisi Nurmuhanbet Dııarov madaqtaý dıplomymen marpattalyp, 150 myń teńge aqshalaı syıaqyǵa ıe boldy.
«Altyn qalam» konkýrsynyń uıymdastyrýshylary baıqaý kelesi jyly da jalǵasyn tabatynyn atap ótti.
