Qazaq tildi mektepterdegi bilim sapasy jyldan-jylǵa artyp keledi - Astana qalalyq tilderdi damytý basqarmasynyń bastyǵy
ASTANA. Aqpannyń 22-si. QazAqparat /Marlan Jıembaı/ - Búgin elordadaǵy «Báıterek» halyqaralyq medıa ortalyǵynda Astana qalalyq tildirdi damytý basqarmasynyń bastyǵy Orazgúl Asanǵazynyń qatysýymen «Tilderdi qoldaný men damytýdyń 2001-2010 jyldarǵa arnalǵan memlekettik baǵdarlamasyna» oraı baspasóz máslıhaty ótti.
Qalalyq tilderdi damytý basqarmasy bastyǵynyń aıtýynsha, 1998 jyldan beri Astana qalasyndaǵy qazaq tildi mektepterdiń, balabaqshalardyń sany birshama kóbeıe túsken. Degenmen, kóptegen ata-analardyń qazaq tildi mektepterdiń bilim berý deńgeıi tómen dep sanaıtyndyǵyn atap ótken ol, «olardyń sany ǵana emes bilim sapasy da sońǵy jyldary artyp otyr. Sondyqtan ata-analar balalaryn qazaq mektepterine berýden esh qoryqpaýy kerek. Máselen, ótken jyly mektep bitirip, «Altyn belgi» ıelengen 73 elordalyqtyń 61-i qazaq synybynda oqyǵan. Sonymen qatar túrli halyqaralyq baıqaýlardyń júldeli oryndaryna ilikken 68 oqýshynyń da 63-i qazaq synybynda bilim alǵan balalar», dedi.
Basqarma bastyǵynyń sózine qaraǵanda, 1998 jyly elordada 27-i ǵana kóshe qazaqsha atalsa, qazirgi ýaqytta kóshelerdiń 80 paıyzǵa jýyǵy tolyqtaı qazaqsha ataýǵa ıe bolǵan. Sondaı-aq sol kezeńderde orys tilinde bolǵan barlyq balabaqshalardyń da ataýy búgingi kúni qazaqshalanǵan.
Onyń aıtýyna qaraǵanda, aıaqtalýyna áli bir jyl bar atalǵan baǵdarlamanyń júzege asyrylýy barysynda birshama jetistikterge qol jetkizilgen. Degenmen, kemshin tustary da joq emes. Máselen, elorda mekemelerinde is júrgizý 2007 jyly tolyqtaı memlekettik tilge kóshkenimen, qujattar resmı tilde daıyndalyp, sodan keıin ǵana memlekettik tilge aýdarylyp keledi. «Astanadaǵy memlekettik mekemelerdegi qyzmetkerlerdiń 60 paıyzy qazaq tilinde sóılep, memlekettik tilde qujat daıyndaı alǵanymen, qalǵandary áli de bolsa aýdarmashynyń kómegine júginip otyr», dedi ol.
Atalǵan sharaǵa QR Mádenıet jáne aqparat mınıstrligi Til komıtetiniń tóraǵasy Erbol Sháımerdenulynyń da arnaıy shaqyrylǵandyǵyn aıtqan ortalyq ókilderiniń sózine qaraǵanda, komıtet tarapynan ne jazbasha ne bolmasa aýyzsha jaýap bolmaǵan.
