Qazaq tildi elektrondy baspasózdi damytýǵa basa nazar aýdaramyz - QR Mádenıet jáne aqparat mınıstri

ASTANA. 11 qarasha. QazAqparat - Búginde qazaq tildi baspasózdiń elektrondy nusqasyn myqtap qolǵa alý qajet. Búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte QR Mádenıet jáne aqparat mınıstri Muhtar Qul-Muhammed osylaı dedi.

«Qazirgi kezde biz barlyq jańalyqtardy tańerteń oqımyz. Tústen keıin onyń barlyǵy mańyzdy emes bolyp qalýy múmkin. Al gazet-jýrnaldardyń erteńgi nómiri shyqqansha, biraz ýaqyttyń ketetini belgili. Árıne, gazettiń alystaǵy aýylǵa jetýi kerek. Alaıda kóziqaraqty, kreatıvti oqyrman barlyq jańalyqtardy ǵalamtordan alyp, oqı salady. Sondyqtan qazaq tildi buqaralyq aqparat quraldary bolashaqta ózderiniń ınternet saıttaryn myqtap qolǵa alýlary qajet. Baspasózdiń jumysy tek taralymmen ǵana emes, onyń saıtyna kirgen adamdardyń sanymen de baǵalanatyn bolady», - dep atap kórsetti M.Qul-Muhammed.