Qazaq tildi bloggerlerdiń 2-nshi quryltaıy ótti

Sharaǵa Qazaqstannyń ár túkpirinen jáne Qytaıdan barlyǵy 150-ge jýyq  blogshy qatysyp, Qaznettegi keleli máselelerdi ortaǵa saldy, tájirıbelerimen jáne jańa jobalarymen bólisti. Atap aıtqanda, qazaq tildi saıttardy damytý, blog salasyndaǵy túıitkilder, ınternettegi túrli quraldardy paıdalaný syndy ózekti máseleler talqylandy.

Quryltaı aıasynda dástúrli saıttar men jobalar da nazardan tys qalmady. Shara demeýshileri «Qazaqtelekom» AQ usynǵan  1 jyldyq tegin  hostıng - «It tirlik» jobasyn usynǵan Tımýr Bekturǵa, blogl.kz jobasy úshin - Eldar Qudaıbergenovke, zerdeli jobasy úshin - Názıra Burhanovaǵa, sondaı-aq 1 jyldyq tegin megalaın - «Qyzdar álippesi» jobasy úshin Aıbek Qýandyqovqa, bugin.kz jobasy úshin Meıirman Túıteshevke jáne Vıdeblog jobasynyń avtorlaryna berildi. Al «Qazteleradıo» AQ usynǵan «Otaý TV» júldesine «Aıqarakóz» saıty ıe boldy. Sondaı-aq úzdik tusaýkeserler men blogshylarǵa Veeline baılanys operatorynyń syılyqtary berildi.

«Byltyr negizinen blog salasy týraly sóz bolsa, bıyl jalpy ınternetke kóbirek kóńil bólindi. Saıttardyń sany ósken. Bul aldaǵy ýaqytta qazaq tildi saıttar úshin award deńgeıindegi ınternet júlde taǵaıyndalýy kerektigin, quryltaıdyń jalpy ınternetti qamtıtyn elimizdegi eń iri sharaǵa aınalatynyn kórsetip otyr»,- deıdi blogshy, jýrnalıst Erbol Azanbek.

Eske sala keteıik, qazaq tildi blogshylardyń birinshi quryltaıy 2011 jyly Almaty qalasynda ótkizilgen bolatyn. Alys-jaqyn shet elderden jáne Qazaqstannyń ár óńirinen jınalǵan 200-ge jýyq blogshy eki kún boıy Qaznettiń keleli máselelerin talqylaǵan edi.