«Qazaq teńizshi bola almaı ma?» - respýblıkalyq basylymdarǵa sholý

TANA. 4 qazan. QazAqparat - Qazaq aqparat agenttigi respýblıkalyq basylymdarda 4 qazan, seısenbi kúni shyqqan ózekti materıaldarǵa sholýdy usynady.

***
«Egemen Qazaqstan» basylymy búgingi sanynda Qazaqstan Respýblıkasy­nyń eńbek sińirgen ártisi, Memlekettik syılyqtyń laýreaty, Qazaq­tyń memlekettik Abaı atyndaǵy akade­mııa­lyq opera jáne balet teat­ry­nyń ánshisi Maıra Muhamedqyzymen bolǵan "Sheteldegi meniń ekinshi atym. Ol - Qazaqstan" atty tushymdy suhbatty jarııalap otyr. Qazaq jerine sonaý Aspanasty elinen at arytyp oralǵan qandasymyz Táýelsizdiktiń qadiri syrtta júrip-aq bilingendigin jáne onyń qanshalyqty baǵaly ekendigin sezingenin aıtady. «Erkin sóıleımin, erkin pikirlesemin, emin-erkin óleńimdi aıta­myn. Maǵan bir adam tosqaýyl qoıa al­maıdy. Óıtkeni, derbes tulǵamyn. Ol - sol erkindiktiń arqasy», - deıdi ol. «Ras, syrttaǵy óner joly ońaı emes. Óıtkeni, shetelde sahnaǵa qazaǵymnyń aty menimen birge shyǵady ǵoı. Qazirdiń ózinde meni kim dese - bári «Qazaqstan» deıdi. Sondaıda odan beter jaýapkershilikti eseleısiń», - deıdi ánshi.

***

«Alash aınasy» basylymynyń jazýynsha, otandyq munaı kemelerimen qara altyndy shetelge tasymaldap jatqandardyń basym bóligi, tipti 80 paıyzy - óz mamandarymyz emes, sheteldik azamattar. Elimizdiń ekonomıkasynyń kóterilýine septigin tıgizip otyrǵan - osy qara altynymyz ekendigin eskersek, bul salanyń nelikten sheteldikter jiligin shaǵyp otyr. Ol jaıynda «Qazaq teńizshi bola almaı ma?» degen maqaladan bilýge bolady.

***

«Qazaq eli bıyl óz tarıhynda tuńǵysh ret «Indýstrııalandyrý kúni» merekesin atap ótetin boldy!», dep jazady «Aıqyn» basylymy búgingi sanynda. Gazettiń jazýynsha, Indýstrııa jáne jańa tehnologııalar mınıstrligi, ózge de jaýapty memlekettik organdarmen tize qosyp, búginde Indýstrııalandyrý kúnin merekeleýge qyzý daıyndyq júrgizýde eken. Mereke kezindegi is-sharalar jaıynda tolyǵyraq «Tarıhymyzǵa taǵy bir meıram keldi» atty maqaladan oqı alasyzdar.

***

Ótken demalysta buqara ıgiligi úshin «Medeý» muz aıdyny paıdalanýǵa berildi, dep habarlaıdy «Kazahstanskaıa pravda» basylymy. «Álemdik rekordtar fabrıkasynyń» jańa maýsymyn ashýǵa júzdegen almatylyqtar men qala qonaqtary keldi», - delingen «Medeýdegi jańa maýsym» atty maqalada.