Qazaq televızııasynyń ardageri Hamıt Hasenovke eskertkish taqta qoıyldy

1975-1978 jyldary - Qazaq KSR-i Mınıstrler keńesindegi Radıohabarlar jáne teledıdar jónindegi memlekettik komıtet tóraǵasy bolǵan Hamıt Hasenovke Abylaı han dańǵylynyń boıynda, burynǵy ózi turǵan úıdiń qabyrǵasyna eskertkish taqtasy ilindi.

Qazaq televızııasynyń kirpishin qalaýǵa úles qosqan Hamıt Hasenov tusynda «Tamasha», «Qymyzhana», «Aıtys» syndy baǵdarlamalar jaryqqa shyqqan edi. Saltanatty sharaǵa qonaq bolǵan televızııa ardageri, birneshe býyn jýrnalısterdiń ustazy Qusman Igisinov qaıratkerdi eske aldy.

«Men Qazaq radıosyna 1966 jyly keldim. Al Hameń, Hamıt Hasenuly bizdiń radıoǵa tóraǵa orynbasary bolyp 1969 jyly keldi. 1975 jylǵa deıin 6 jyl boıy orynbasar bolyp otyrdy. 1983 jylǵa deıin 8 jyl jyl tóraǵa boldy. Ekeýin qosqanda 15 jyl. Men radıoda 20 jyl, teledıdarda 20 jyl, bárin qosqanda 40 jyl istedim. 15 jylym Hameńmen birge ótti. Hameńniń syrttaı ereksheligi bylaı qarasań susty kórinetin, qabaǵy túıińki. Al endi ishki jan dúnıesine kelgende sondaı móp-móldir, taza, adamgershiligi, kisiligi keremet edi», - dedi Qusman Igisinov.
 

Qazaq televızııasy komıtetiniń basshylarynyń biri, arnanyń aımaqtardaǵy fılıaldarynyń efırge shyǵýyna tikeleı túrtki bolǵan Keńesbaı Ábenov te aǵa býyn eńbegine baǵa berip ótti.

«Hamıt Hasenuly bizdiń komıtette kóp jumys istegen. Áýeli radıo jóninde orynbasar bolyp keldi bizge. Sol kezderde men Qazaq radıosynyń bas ınjeneri edim. Birge jumys jasadyq. Ár habardy árlep, keremetteı jasaıtyn. Televıdenıe Qazaq radıosynan bólinip shyqty. Óıtkeni kóptegen kadrlar radıodan televıdenıege aýysty. Óz ýaqytynda sol tóraǵalar jaqsy jumys istedi. Ardagerlerdi umytpaıyq», - dedi Keńesbaı Ábenov.

Shara tizginin ustaǵan Nurtileý Imanǵalıuly óz kezeginde televızııa salasyndaǵy qolǵa alynýǵa tıis sharýalardy qulaqqaǵys etti.

«Qazaqtyń qara shańyraǵy qazaq televızııasynyń, qazaq radıosynyń kıesi bizge bir qarap, ketip qalǵysy kep, áli kete qoımaı júrgen sekildi kórinedi maǵan. Sol kıeni oraltýdyń búgin asa mańyzdy bir sharasyn istep jatyrmyz dep esepteımin. Tarıhymyzdy taný - ózimizdi taný. Qazaq televızııasynyń 60 jyldan, Qazaq radıosynyń 90 jyldan astam tarıhy bar», - dedi Nurtileý Imanǵalıuly.

Ol Hamıt Hasenulynyń izdeýshisi bar ekenin aıtyp, kindiginen taraǵan 5 qyzy - Alma, Láılá, Zýhra, Gúlmıra, Elmırany ortaǵa shaqyryp, sóz berdi.

«Qazaqstan teleradıokorporatsııasynyń Almaty qalasyndaǵy fılıaly dırektory Marat Sandyqbaevqa jáne Almaty ákimdigi mádenıet jáne arhıvter basqarmasyn erekshe atap óteıin. Rahmet sizderge bizdi qoldap, kómek kórsetkenderińizge. Bizdiń ákemiz memleket qaıratkeri bolǵan, sonymen qatar úlgili, qamqor áke boldy. Anamyz Ánýar Qadyrqyzymen 40 jyl tatý-tátti ómir súrdi. 5 balany ósirdi. Bizge jaqsy tárbıe, joǵary bilim berdi. Biz búgin ákemizdiń 90 jyldyǵyna arnap eskertkish belgi qoıyp, paryzymyzdyń bir parasyn ótedik», - dedi Gúlmıra Hasenqyzy.