Qazaq televızııasyna 60 jyl: Stýdentter arasynda baıqaý jarııalandy
ASTANA. QazAqparat - Qazaq televızııasynyń 60 jyldyǵyna oraı, «Habar» agenttigi stýdentter arasynda baıqaý jarııalady, dep habarlaıdy QazAqparat tilshisi.
Bul týraly «Habar» agenttigi basqarma tóraǵasynyń orynbasary Rınat Kertaev Ortalyq kommýnıkatsııalar qyzmetinde ótken baspasóz máslıhatynda aıtty.
«Kelesi aptadan bastap Habar agenttigi» Qazaq televızııasynyń 60 jyldyǵy jáne Habar agenttigi» taqyrybynda JOO stýdentteri arasynda ocherkter baıqaýyn jarııalaıdy. Baıqaýda kez kelgen stýdent qazaq televızııasynyń damýy, onyń ishinde Habar televızııasynyń oryn týraly óz ocherkin agenttikke jiberýi tıis. Habar agenttiginiń shyǵarmashylyq tobynan qurylǵan ádilqazy alqasy bir aı kóleminde kelip túsken materıaldardy iriktep, qazaq jáne orys tilderindegi birinshi, ekinshi, úshinshi oryn alǵan stýdentterdi anyqtaıdy», - dedi R.Kertaev.
Agenttik ókili baıqaýdyń barlyq mamandyq stýdentterine arnalǵanyn atap ótti jáne úmitkerdiń oı tereńdigi men oı tereńdigine basa mán beriletinin jetkizdi.
«Bul jerde beınerolıkter, derekti fılmder baıqaýyn uıymdastyrýǵa bolar edi, biraq barlyq stýdenttiń beınekameraǵa túsirip, montaj jasaýyna múmkindik joq. Sondyqtan, birinshi kezekte jarysqa qatysýshynyń oı tereńdigi, jazý sheberligi jáne qazaq televızııasyna degen pozıtsııasyna zer salýdy uıǵardyq. Gýmanıtarlyq mamandyq stýdentteri ǵana qatyssyn dep shekteý qoıýdan da aýlaqpyz. Sebebi, Qazaq televızııasynyń 60 jyldyǵyn jýrnalısterdiń ǵana merekesi emes, eldiń tarıhy, Qazaqstannyń barlyq azamattaryna ortaq data dep bilemiz», - agenttik ókili.
Birinshi oryn alǵan stýdentterge Habar agenttigi qaramaǵyndaǵy tórt telearnanyń birinde shyǵarmashylyq praktıkadan ótýge jáne bolashaqta komandanyń bir múshesi bolýǵa múmkindik beriledi.
Baıqaý talaptary kelesi aptada Habar agenttiginiń saıtynda jarııalanady.
