Qazaq televızııasy - qazaq zııaly qaýymynyń rýhanı, mádenı oshaǵy boldy - Erlan Qarın
ASTANA. QazAqparat - Qazaq televızııasy - qazaq zııaly qaýymynyń rýhanı, mádenı oshaǵy boldy. Bul týraly «Qazaqstan» RTRK» AQ-nyń Basqarma tóraǵasy Erlan Qarın Feısbýktegi paraqshasynda jazdy, dep habarlaıdy QazAqparat.
El turǵyndaryn qazaq televızııasynyń 60 jyldyǵymen quttyqtaǵan E.Qarın osydan 60 jyl buryn qazaq televızııasynyń negizi qalanyp, alǵashqy otandyq habarlar efırge shyǵa bastaǵandyǵyn aıtady.
«1958 jyly 8 naýryzda alǵashqy ret efır synaq retinde taratyldy, al 16 naýryzda efır turaqty túrde taratyla bastady. Qazaq televızııasynyń 60 jyldyq damý tarıxynda halqymyzdyń rýhanı, mádenı, qoǵamdyq qundylyqtarynyń damýyna, ulttyq sana-sezimniń qalyptasýyna qosqan úlesi ólsheýsiz, mańyzy erekshe. Ár qazaqtyń tórinen oryn alǵan kógildir ekrannan san túrli qundy dúnıeler jaryq kórip, qalyń kórermenge jol tartty»,-dep jazdy ol.
Sondaı-aq E.Qarın qazaq televızııasy - qazaq zııaly qaýymynyń rýhanı, mádenı oshaǵy bolǵandyǵyn aıtady. Osy qara shańyraqta ár jyldary eńbek etken zııaly qaýym kóptegen jas mamandardy tárbıelep, bolashaqqa baǵyt berip, jol siltedi, otandyq televızııa mektebiniń qalyptasýyna atsalysty. Ulttyq arna ár kezeńde zaman aǵymyna saı ózgerip, bolashaqqa qanat qaǵyp keledi.
«Biz ádettegideı, «Altyn qorda» saqtalǵan telebaǵdarlamalar men televızııa ardagerleri jaıly baǵdarlamalardy kórsetýdi jalǵastyramyz. Onda belgili kúıshi jáne termeshi, qazaq teledıdarynyń rejısseri Murat Kárımýllın jaıly «Jarqyn beıne», qazaqtyń alǵashqy dıktory Zulqııa Jumatova jaıly «Kelbet» degen habarlar kórsetildi. 10 naýryzda, 08:20-da jáne 11 naýryz, 11:25-te qazaq televızııasynyń ardagerleri qatysqan «Dara jol», 10 naýryz kúni 16:35-te qazaq televızııasynyń 60 jyldyǵyna arnalǵan arnaıy habar, al 11 naýryzda, 17:25-te belgili jýrnalıst Beıbit Qusanbektiń «Ómir-ózen» baǵdarlamalaryn tamashalaı alasyzdar! Keshegi kún - búgingi tarıh demekshi, kezinde el múddesi úshin atsalysqan ardagerlerimizdi umytpaý - bizdiń paryzymyz!»,-deıdi Basqarma tóraǵasy.
Al, 16 naýryzda «Qazaqstan» Ulttyq arnasy qazaq televızııasynyń 60 jyldyǵyna oraı, televızııa ardagerlerine arnap saltanatty jıyn ótkizbek.
«Aldaǵy ýaqytta Ulttyq arnany budan da bıik asýlar kútip tur. «Qazaqstan» ujymy talaı belesterdi baǵyndyryp, úlken jetistikterge jetetinine senimdimiz! Barshańyzdy Qazaq televızııasynyń 60 jyldyq mereıtoımen quttyqtaımyz!»,-delingen E.Qarınniń jazbasynda.
