"Qazaq televızııasy» entsıklopedııasynyń 1-2 tomdary jaryq kórdi
MATY. 8 qarasha. QazAqparat /Erlik Erjanuly/ - Búgin Almatydaǵy ál-Farabı atyndaǵy Qazaq ulttyq ýnıversıteti jýrnalıstıka fakýltetiniń professory Temirbek Qojakeev atyndaǵy dárishanasynda «Qazaq televızııasy» kóp tomdyq entsıklopedııasynyń alǵashqy 2 tomynyń tusaýkeser rásimi boldy.
Ol TMD elderindegi alǵashqy, al AQSh, Anglııa, Kanada jáne Avstralııa elderiniń ǵalymdary 1999 jyly shyǵarǵan "Teleentsıklopedııadan» keıingi eń iri anyqtamalyq bolyp otyr. Entsıklopedııada otandyq ǵana emes, alys‑jaqyn sheteldiń telekompanııalary men árjyldarda teleefırden ótken, kórermenge tanymal baǵdarlamalary jaıly da keń túsinik berilgen. Ideıa avtory jáne joba jetekshisi fılologııa ǵylymdarynyń doktory, professor, Halyqaralyq televızııa jáne radıo akademııasynyń (LATR) korrespondent‑múshesi Qudaıbergen Tursyn.
«1970‑1990 jyldary Qazaq KSR Memteleradıokomıtetiniń júıesinde 7000-ǵa jýyq adam túrli salada qyzmet atqardy. Olardyń árqaısysy óz isiniń kásibı mamandary bolatyn. Bul kitapty shyǵarýdaǵy basty maqsat - Azamattyqtyń úlgisin tanytyp, eldiktiń týyn ustaǵan aǵalarymyz ben apalarymyzdyń, ári áriptesterimizdiń ult rýhyn asqaqtatqan aıbyndy ári jaýapty eńbekteriniń aldynda bas ıip, taǵzym etý. Kitaptyń alǵashqy tomy álipbılik retpen A‑dan G‑ge deıin, ekinshisi G-den K árpine deıingi aralyqty qamtıdy», - deıdi Q. Tursyn.
