Qazaq tehnologııa jáne bıznes ýnıversıteti «Stýdentter qataryna qabyldaý» rásimin ótkizdi
ASTANA. QazAqparat - 1 qarasha kúni «Jastar» saraıynda Qazaq tehnologııa jáne bıznes ýnıversıteti І kýrs stýdentterin «Stýdentter qataryna qabyldaý» rásimin saltanatpen atap ótti.
Jyl saıyn dástúrli túrde ótkizilip kele jatqan merekelik keshtiń shymyldyǵy Qazaq tehnologııa jáne bıznes ýnıversıtetiniń prorektory, tehnıka ǵylymdarynyń doktory, professor Esenbaı Álpeıisovtiń quttyqtaý sózimen ashyldy.
Osy bilim ordasyna oqýǵa túsip, bolashaqta eldiń eńseli órkendeýine óz úlesterin qosýǵa bel baılaǵan talapty jastarǵa ýnıversıtet prorektory aq tilegin aǵytyp, keleshekteriniń jarqyn, úırenýleriniń jemisti bolýyn shyn júrekten tiledi.
«Qazaq tehnologııa jáne bıznes ýnıversıteti - Qazaqstannyń soltústik óńiri úshin azyq-túlik, jeńil jáne munaı-hımııa ónerkásip salalary boıynsha básekege qabiletti kadrlardy ázirleýge mamandanǵan joǵary oqý oryndarynyń biri. Ýnıversıtettiń ujymy ǵylymı zertteý, tárbıelik jumys júrgizý ári bilim berý protsessinde ınnovatsııalyq tehnologııalardy qoldaný jáne materıaldyq-tehnıkalyq bazany tıimdi paıdalaný arqyly sapaly bilim berýge umtylyp keledi. Bizdiń ýnıversıtet keler jyldan bastap jańa kampýsta oqýdy bastaıdy. Onda stýdentterdiń jaıly ortada, kemel bilim alýlaryna barlyq jaǵdaı qaraılastyrylǵan. Talapty jastar, sizderdiń oqý ordamyzdyń stýdentteri qataryna qabyldanýlaryńyzben shyn júrekten quttyqtaımyn! Osynda alǵan bilimderińizdi bolashaqta Otanǵa, elge qyzmet jasaýǵa jaratyńyzdar. Stýdenttik ómirlerińiz qyzyqty da mándi ótýine tilektestik bildirem», - dep atap ótti Esenbaı Álpeıisov.
Osydan keıin merekelik is-shara aıasynda stýdenttik qatarǵa jańa qabyldanǵan jastarǵa stýdenttik bıletter saltanatty túrde tapsyryldy. Dýmandy keshtiń kórermenderine «Jaıdarman» toptarynyń jarasymdy ázili men ónerli jastardyń án-kúıi kóterińki kóńil kúı syılaı bildi. Al atalmysh oqý ornynyń «Jeńil ónerkásip tehnologııasy jáne dızaın kafedrasy» daıyndaǵan erekshe stıldegi kıim toptamalary kópshiliktiń nazaryn erksiz ózderine aýdardy. Solardyń ishindegi «Tumar hanym» kollektsııasy naǵyz sheber qoldyń týyndysy ekenin áıgilep turdy. Al bulardan basqa búgin sahanaǵa shyǵarylmaǵan «Aı arý», «Aqbata» kıim toptamalary da kóptegen ortada jaqsy baǵasyn alyp júr eken.
Baqytjol Kákesh
1
