Qazaq tehnologııa jáne bıznes ýnıversıteti múmkindigi shekteýli balalarǵa jańa jyldyq syılyqtar tapsyrdy
ASTANA. QazAqparat - Qazaq tehnologııa jáne bıznes ýnıversıtetiniń oqytýshylary men stýdentteri elordadaǵy Balalar psıhonevrologııalyq medıtsınalyq-áleýmettik mekemesine baryp, ondaǵy tárbıelenýshilerge jańa jyldyq syılyqtardy tabys etti.
Balalar psıhonevrologııalyq medıtsınalyq-áleýmettik ortalyǵynda jańa jyldy kóńildi qarsy alýǵa arnaıy uıymdastyrylǵan merekelik sharada Aıaz Ata men Aqshaqar, sondaı-aq ádemi kıingen kóptegen halyqtyq ertegilerdiń keıipkerleri qatysqan dástúrli jańa jyldyq qoıylymdar kórsetildi. Balalar shyrshanyń aldynda qol ustasyp, bı bılep, óleń oqydy.
Jańajyldyq baǵdarlama balalardyń kóńilin kóterip, shattyqqa bóledi. Merekelik is-shara sońynda balalar asyǵa kútken jańa jyldyq syılyqtarynda tapsyryp aldy. Qazaq tehnologııa jáne bıznes ýnıversıteti atynan balalarǵa osy joǵary oqý ornynyń «Jeńil ónerkásip tehnologııasy jáne dızaın» kafedrasynyń stýdentteri arnaıy óz qoldarymen tikken jańa jyldyq merekelik balalar kostıýmdary, Aıaz Ata men Aqshaqarǵa arnalǵan kıimder jáne tátti taǵamdar úlestirilip berildi. Ýnıversıtettiń ónerli stýdentterin bastap barǵan tehnıka ǵylymdarynyń kandıdaty Botagóz Nurmuhambetova jáne tehnıka ǵylymdarynyń kandıdaty, dotsent Raısa Djakparova balalarǵa jańa jyldyq quttyqtaý sózderin arnap, tilekterin bildirdi.
Astana qalasynyń Balalar psıhonevrologııalyq medıtsınalyq-áleýmettik mekemesinde 3 jastan 18 jasqa deıingi múmkindigi shekteýli 210 bala kúndizgi statsıonarǵa tirkelgen. Balalarmen psıhologtar, áleýmettik pedagogtar, logopedter, dárigerler men tárbıeshiler jumys jasaıdy. Olar sýret salýdy, ermeksazben músin jasaýdy úırenip, án jáne bı sabaqtaryna barady, úıde eńbek etýge daǵdylanady. Internattyń negizgi mindeti - múmkindigi shekteýli balalardy qoǵam ómirine qatystyrý úshin barlyq jaǵdaılardy jasaý, osy rette demeýshiler men qaıyrymdylyq kórsetýshi jandardyń qoldaý kórsetýi úlken mańyzǵa ıe boldy.
Baqytjol Kákesh
