Qazaq tazylary Shveıtsarııadaǵy ıtter kórmesine qatysyp jatyr

JENEVA.QazAqparat – Qazaqstandyq kınologtar tazy tuqymdas eki ıtpen uzaq jol júrip (7,8 myń shaqyrymnan astam) Jenevaǵa jetti, dep habarlaıdy QazAqparat tilshisi.

World Dog Show-2023 álem chempıonaty qarsańynda «Jeneva Gran-prıi» halyqaralyq kórmesi ótip, oǵan bizdiń ıtter alǵash ret qatysty.

Tumar esimdi tazy CAC ataǵyn aldy. Bul ıttiń ulttyq chempıondyqqa, ıaǵnı «Shveıtsarııa chempıony» ataǵy úshin kúresetinin bildiredi.

Vangelııa esimdi ekinshi tazy «ardagerler» klasy boıynsha «Úzdik tuqym ókili» (LPP) ataǵyn aldy, sonymen qatar ulttyq chempıondarǵa (CAC ataǵy) úmitker boldy.

«Shveıtsarııa gran-prıi» Shveıtsarııada 23-27 tamyz aralyǵynda ótetin halyqaralyq kınologııalyq qaýymdastyqtyń (FCI) aǵymdaǵy jarystarynyń serııasyn ashty.

Osy jarystar aıasynda 27 tamyz kúni qazaq tazy ıtteri World Dog show 2023 álem chempıonatynyń basty sharasyna qatysady.

Uıymdastyrýshylardyń aıtýynsha, World Dog Show-2023 sharasyna álemniń ártúrli elderinen 20 myńnan astam ıt baq synaıdy.

200 túrli ıt tuqymyn 150-ge jýyq halyqaralyq tóreshi baǵalaıdy.

Halyqaralyq sanattaǵy sarapshy, FCI Halyqaralyq kınologııalyq federatsııasynyń sarapshysy Omarov Zaza (Grýzııa) tazy týraly pikirin bólisti.

Ol tazy - ıtterdiń erekshe tuqymyna jatatynyn jáne eýropalyq kórermenderdiń úlken qyzyǵýshylyǵyn týǵyzǵanyn atap ótti.

Onyń pikirinshe, tazy minezi men túri boıynsha erekshelenedi.

«Tazy - óte qyzyq, maǵan unaıdy. Myqty tazylar kóp, men olardy Qazaqstanǵa barǵanda kórdim. Eń bastysy, bul tuqymdy qazir óz deńgeıinde ustaýymyz kerek», – deıdi grýzın sarapshysy.

Sondaı-aq Z.Omarov Qazaqstannyń FCI halyqaralyq kınologııalyq federatsııasynyń tolyqqandy múshesi ataný arqyly alǵa úlken qadam jasaǵanyn atap ótti.

«Bul eldiń kez kelgen FCI assambleıasynda daýys berýge quqyǵy bar ekenin bildiredi. Eń bastysy, qazir halyqaralyq deńgeıdegi barlyq sharalarǵa únemi qatysý», - dedi Z.Omarov.