Qazaq tazylary Helsınkıdegi Dúnıejúzilik ıtter kórmesinde álemge tanystyryldy
ASTANA. KAZINFORM – 8 tamyzda Fınlıandııa astanasy Helsınkıde ótip jatqan halyqaralyq kınologııalyq federatsııa (FCI) egıdasy aıasyndaǵy World Dog Show 2025 dúnıejúzilik ıtter kórmesinde «Qazaq tazysy» ıt tuqymy resmı túrde álemge tanystyryldy.
Qazaqstan kınologtary odaǵy baspasóz qyzmetiniń málimetinshe, dúnıejúzilik is-sharaǵa Qazaqstan delegatsııasy qatań talap boıynsha iriktelgen ári halyqaralyq deńgeıde óner kórsetýge barynsha úıretilgen 8 tazyny aparǵan. Álemniń ár túkpirinen kelgen 25 000 úzdik ıttiń ishinde qazaq tazylary FCI uıymynda tirkelgen derbes ıt tuqymy retinde tuńǵysh ret jurt nazaryna usynyldy.
Qazaqtyń tól ıt tuqymdary alǵashqy saıysta aıtarlyqtaı mańyzdy nátıjege qol jetkizdi: 5 tazy ózderiniń rıngterinde júldeli oryndardy jeńip aldy. «2025 jylǵy Álemniń jas chempıony» atalymynda Temirlan atty tazy jeńimpaz boldy, Lashyn – «Álem chempıony», Arý atty taǵy bir tazy – «Álem chempıony», Kókserek pen Pana – «Álemniń vıtse-chempıondary» atandy.
Buǵan qosa, Lashyn men Arý Fınlıandııa chempıondary retinde marapattaldy.
Qazaqstannyń tanystyrylymy kórme qatysýshylary men qonaqtarynyń qyzyǵýshylyǵyn týdyrdy. Ulttyq atrıbýttary bar jartylaı orda túrindegi pavılon is-sharadaǵy kózge kóbirek túsken alańdardyń birine aınaldy. Qonaqtar Qazaqstannan kelgen ıttermen sýretke túsip, onyń syrtqy sıpatyndaǵy erekshelikterimen, tarıhymen, erekshe qasıetterimen tanysty.
Qazaqstan kınologtary odaǵynyń tazynyń shyǵý tegi, qasıetteri týraly baıandady, halqymyz ony nelikten jaqsy kóretinin jáne qadirleıtinin túsindirdi, ol bizdiń ulttyq baılyǵymyz, halqymyzdyń jeti qazynasynyń biri sanalatynyn jetkizdi.
Qazaqy tazyny saqtaý jáne tanytý jónindegi jumystar Memleket basshysynyń tapsyrmasy boıynsha, 2022 jyldyń tamyz aıynan beri QR Prezıdenti Іs basqarmasynyń jetekshiligimen júrgizilip keledi. Úsh jylda Qazaqstan kınologtary odaǵymen birlesip, osy baǵytta aýqymdy jumys atqaryldy.
Atap aıtqanda:
– 2023 jyly tamyz aıynda Qazaqstan kınologtary odaǵy FCI-dyń tolyqquqyly músheligine ótip, ulttyq ıt tuqymdaryn halyqaralyq arenada tanystyrý quqyna ıe boldy.
– 2024 jyly mamyrda Astanada ótken monotuqymdy ıtter kórmesi kezinde FCI komıssııasy 100 tazyny zerttedi.
– 2024 jyly 3 qyrkúıekte Amsterdamda «qazaqy tazy» tuqymyn ádepki taný týraly sheshim shyǵyp, Qazaqstanǵa onyń tolyqqandy ıesi degen mártebe berildi.
Tazy tuqymyn damytý, halyqaralyq saıystarǵa belsendi túrde qatystyrý syndy sharttar oryndalǵan jaǵdaıda 2034 jylǵa qaraı ony tolyqtaı taný týraly sheshim shyǵýǵa tıis. World Dog Show 2025 kórmesine qatysyp, Helsınkıde tazylardy resmı túrde jurt nazaryna usyný osy baǵyttaǵy mańyzdy qadamdardyń biri boldy.
Buǵan deıin Senator Bıbigúl Jeksenbaıdyń depýtattyq saýalynda qazaq tazysyn saqtaý jáne qorǵaý máselesin kótergenin jazǵan edik.