Qazaq-tájik qatynasy: strategııalyq seriktestikti nyǵaıtýǵa basymdyq berildi
ASTANA. KAZINFORM — Qasym-Jomart Toqaev Óńirlik ekologııalyq sammıtke jáne Halyqaralyq Araldy qutqarý qory quryltaıshy memleketteri keńesiniń otyrysyna qatysý úshin Astanaǵa kelgen Tájikstan Prezıdenti Emomalı Rahmonmen kezdesti. Bul týraly Aqordanyń baspasóz qyzmeti málim etti.
Memleketter basshylary qazaq-tájik qarym-qatynasynyń qazirgi jaı-kúıi men perspektıvasyn talqylap, eki el arasyndaǵy strategııalyq seriktestik deńgeıin kóterýge kelisti.
— Áńgimelesý barysynda saýda-ekonomıka jáne sý-energetıka salalaryndaǵy yntymaqtastyqqa erekshe nazar aýdaryldy. Taraptar buǵan deıin joǵary deńgeıde qol jetkizilgen ýaǵdalastyqtardy tolyq iske asyrý mańyzdy ekenin atap ótti, — delingen habarlamada.
Sondaı-aq Qasym-Jomart Toqaev pen Emomalı Rahmon óńirlik jáne halyqaralyq kún tártibindegi ózekti máseleler jóninde pikir almasty.
Eske sala keteıik, Astanaǵa tórt memlekettiń basshysy ekologııalyq sammıtke keldi.
