Qazaq-tájik yntymaqtastyǵy odaqtastyq deńgeıine kóteriledi: Astanada deklaratsııaǵa qol qoıdy
«Meniń shaqyrýym boıynsha Qazaqstanǵa memlekettik saparmen kelgeni úshin Tájikstan Prezıdenti Emomalı Sharıpuly Rahmonǵa shynaıy rızashylyǵymdy bildiremin.
Tájikstan – biz úshin baýyrlas el, mańyzdy ári senimdi seriktes memleket. Bizdiń halyqtarymyzdy shynaıy dostyq, ortaq tarıh, rýhanı jáne mádenı qundylyqtar biriktiredi.
Osyndaı myzǵymas arqaýy bar qazaq-tájik qarym-qatynasy strategııalyq áriptestik rýhynda qarqyndy damyp kele jatyr», - dedi Qasym-Jomart Toqaev.
Sondaı-aq Qazaqstan basshysy Tájikstan Prezıdentiniń memlekettik sapary eki eldiń arasyndaǵy qarym-qatynasty jańa sapaly deńgeıge kóteretinin aıtty.
«Búgin biz Qazaqstan men Tájikstan arasyndaǵy yntymaqtastyqty odaqtastyq deńgeıine kóterý týraly deklaratsııaǵa qol qoıdyq. Bul – mán-maǵynasy zor qadam. Basty maqsat – eki eldiń dostyǵyn nyǵaıtyp, túrli saladaǵy ózara tıimdi yqpaldastyqqa jańa serpin berý. Biz shaǵyn jáne keńeıtilgen quramdaǵy kelissóz barysynda saıası, saýda-ekonomıkalyq jáne mádenı-gýmanıtralyq baılanystardy damytýǵa basa nazar aýdardyq Osy sapar Qazaqstan men Tájikstan qarym-qatynasyn jańa sapaly deńgeıge kóterýge múmkindik beredi dep senemin», - dedi Memleket basshysy.
Aıta keteıik, keshe Qasym-Jomart Toqaev Qazaqstanǵa memlekettik saparmen kelgen Tájikstan Prezıdenti Emomalı Rahmondy elorda áýejaıynda qarsy alǵan bolatyn.
Al 3 mamyrda Qazaqstan-Tájikstan bıznes-forýmynda birqatar mańyzdy qujatqa qol qoıyldy.
Búgin qos eldiń basshylary shaǵyn quramdaǵy kelissóz ótkizdi. Óz kezeginde E.Rahmon Astanaǵa memlekettik saparmen kelýge shaqyrǵany jáne qazaq halqynyń dástúrli qonaqjaılyǵy úshin Qasym-Jomart Toqaevqa alǵys aıtty.