«Qazaq tarıhynda iz qaldyrǵan Analar izdeledi»- respýblıkalyq basylymdarǵa sholý
***
«Aıqyn» gazetiniń jazýynsha, alda kele jatqan Áıelderdiń halyqaralyq merekesine oraı, halyq qalaýlysy Úkimetke usynyspen shyqqan. Májilis depýtaty Irak Elekeev tarıhshy ǵalymdardan arnaıy komıssııa qurýdy usynypty. «Bul komıssııa ataqty áıelderdiń bizdiń memleketimizdiń tarıhyna qosqan úlesin anyqtaýǵa tıis, - deıdi Premer-mınıstr Kárim Másimovke resmı saýalmen júgingen depýtat. - Sodan keıin komıssııanyń usynýymen Úkimet Qazaqstan tarıhy boıynsha oqýlyqtar men oqý basylymdaryna olardyń esimderin engizýi qajet». Depýtat osylaısha, tarıhı oqýlyqtarda áıelder men erlerge qatysty genderlik teńdikti ornatpaq», - dep jazady basylym. Osy másele jáne Parlament qabyrǵasynda kóterilgen basqa da jaıttar tóńireginde qulaqtanǵyńyz kelse, «Qazaq tarıhynda iz qaldyrǵan Analar izdeledi» degen maqalaǵa kóz salyńyz.
Erteń Qazaqstannyń tennısshileri Devıs kýbogy jolyndaǵy jarystyń fınaldyq bóliginiń alǵashqy kezdesýin Chehııa quramasyna qarsy ótkizedi. Jarys atalmysh memlekettiń Ostrava qalasynda ótedi. Osyǵan oraı «Aıqyn» gazetinde «Devıs kýbogy: Qazaqstannyń tennısshileri erteń Chehııanyń áıgili quramasyna qarsy shyǵady» degen taqyryppen maqala jarııalandy. «Bul básekege qos komanda da myqtap daıyndaldy. Chehtar álemniń ár qıyrynda óner kórsetip júrgen sańlaqtardyń basyn qosyp, jaqsy bir komanda jasaqtasa, qazaqstandyqtar da óz myqtylaryn túgendep, dál qazir sońǵy daıarlyqtaryn pysyqtaýda», - dep jazady basylym.
***
«Alash aınasy» gazetiniń beısenbilik sanyndaǵy «Dat!» aıdarynda aýyl sharýashylyǵy ǵylymynyń doktory, professor Ábdirahman Ombaevpen aradaǵy suhbat jaryq kórdi. Basylym tilshisiniń barlyq saýaldaryna salmaqty jaýap bergen ǵalym: «Bizde aımaqtyq aýyl sharýashylyǵy ınstıtýttaryna kóp kóńil bólinbeı júr. Qazaqstanda úsh ǵylymı ınstıtýt bar. biri - Almatyda, ekinshisi - Petropavlda, úshinshisi - Shymkentte. Osylardyń ishinde mal sharýashylyǵyn zertteýmen aınalysatyn ınstıtýt Almatyda ǵana. Menińshe, asyldandyrý baǵdarlamalaryn Almatydaǵy ınstıtýtta ǵana emes, úsh ınstıtýtta da júzege asyrý kerek tárizdi. Mal sharýashylyǵyna baılanysty ǵylymı zertteýlerdi úsh ınstıtýtqa bólip bergende ǵana jaqsy nátıjelerge qol jetkizemiz dep oılaımyn», - deıdi. Ekeýara áńgimeniń tolyq nusqasyn oqyǵyńyz kelse, «Arabtar shóldi jerde otyrsa da, bir sıyrdan jylyna 10-12 myń lıtr sút saýady, al bizde 2 myń lıtrden aspaıdy» degen taqyrypqa nazar aýdaryńyz.
Osy basylymnyń jazýynsha, Aqtóbede aldyn ala egýden bas tartatyndar kóbeıip barady. Onyń sebebin dárigerler ata-analarynyń dinı senimderimen baılanystyratyn kórinedi. Al ata-analar bolsa «dárigerler óz mamandyqtaryna salǵyrt qaraıdy, olardyń enjarlyǵynan vaktsına salý kezinde aýrý juqtyryp alǵandar bar», dep ýáj aıtady eken. «Biz habarlasqan №1 qalalyq emhanada ártúrli aýrýǵa qarsy egiletin vaktsınany 40-tyń ústinde bala saldyrmaǵan. Olardyń ata-analarymen áńgimelesý jumysyn júrgizgende baıqaǵanymyz, kópshiliginiń syltaýy dinı kózqaraspen baılanysty kórinedi. Arasynda Reseı ǵalymdary túsirip, taratqan beınetaspanyń da áseri bar ekenin aıtady», - dep jazady basylym. Maqalanyń baıybyna barǵyńyz kelse, «Aqtóbelik ata-analardy shoshytqan reseılik taspa» degen maqalany oqyńyz.
***
«Baǵany turaqtandyrý baǵdary». «Astana aqshamy» gazetiniń búgingi nómirinde osy taqyryppen jarııalanǵan maqalada elorda basshysy Imanǵalı Tasmaǵambetovtyń qatysýymen ótken turǵyndarǵa asa qajet azyq-túlik taýarlary baǵasyn turaqtandyrý máselelerine arnalǵan keńes jaıynda jazylǵan. Basylymnyń atap ótýinshe, 5 naýryzdan bastap Astanada taýarlar 5-10 paıyz ǵana ústeme baǵamen satylatyn jáne halyqtyń áleýmettik az qamtylǵan tobyna dıskont qarastyratyn 32 saýda pavılony jumys isteı bastamaq. Sondaı-aq azyq-túlik taýarlary baǵasyn turaqtandyrý jóninde qurylǵan, shtab jumysyn jalǵastyratyn bolady.
***
«Memleket basshysy Nursultan Nazarbaev keshe Respýblıkalyq bıýdjettiń oryndalýyna baqylaý jasaý jónindegi Esep komıtetiniń tóraǵasy Omarhan Óksikbaevty qabyldady», - dep jazady «Kazahstanskaıa pravda» gazeti. Basylymnyń atap ótýinshe, O.Óksikbaev 2010 jyly komıtet tarapynan júrgizilgen baqylaý sharalarynyń nátıjeleri týraly, sonymen qatar ótken jylǵy respýblıkalyq bıýdjettiń oryndalýyna jasalǵan saraptamanyń nátıjeleri jaıly baıandaǵan. «Memleket basshysy qarjylyq baqylaýdy jetildirý, sonymen qatar jergilikti bıýjettiń oryndalýyna syrtqy qarjylyq baqylaý qyzmetin jetildirý jáne nyǵaıtý boıynsha birqatar naqty tapsyrmalar berdi», - degen O.Óksikbaev jýrnalısterge arnalǵan brıfıng barysynda.
