Qazaq tarıhyna qyzyǵýshylyq artyp keledi – Jaqsylyq Sábıtov
ASTANA. KAZINFORM – Sońǵy ýaqytta elimizde ǵylymdy qarjylandyrý kólemi arta tústi. Al ol tarıhı zertteýlerdi jandandyryp, túrli ańyzdardan arylýǵa septigin tıgizedi. Mundaı pikirdi Joshy ulysyn zertteý ǵylymı ınstıtýtynyń dırektory Jaqsylyq Sábıtov bildirdi.
Onyń aıtýynsha, sońǵy birneshe jyl boıy elimizde ǵylym men tarıh salasynda qaıta órleý baıqalady. Degenmen qazirgi ýaqyttaǵy problema basqada jatyr. Ǵalymdar bir-biri úshin jazady. ıAǵnı, olardyń ǵylymı eńbekterimen qarapaıym azamattar tanys emes. Sol sebepti túrli ǵylymı zertteýlerdiń tanymaldyǵyn artyratyn jobalar ózekti bola tústi.
«Túptep kelgende bizde ańyz óte kóp. Olar – jeke, qandaı da bir rýlyq ańyzdar. Qazirgi ýaqytta memleket tarıhymyzdy ózektendirýge tyrysyp otyr. Qazaqstannyń akademııalyq tarıhyn jańadan jazý bastaldy. Ol bilimdi ózektendirip, osy ýaqytqa deıingi oqýlyqtarmen salystyrǵanda jańa oqýlyqtardy barynsha ózekti ári senimdi qyla túsedi», - dedi Jaqsylyq Sábıtov «Kereı men Jánibek» komıksiniń tanystyrylymy aıasynda agenttik tilshisine.
Osy oraıda tarıhshy naqty mysal da keltirdi. Máselen, osydan on jyl buryn ǵalymdar qytaı derekterinen 1447 jyly Kereı men Jánibektiń Qytaıǵa elshi jibergenin, onda ózderin Іlebalyq qalasynyń bıleýshileri retinde kórsetkenin anyqtaǵan. Munan bólek, 1453 jyly Kereıdiń Isfıdjab (qazirgi Shymkent aýmaǵyndaǵy Saıram qalasy) qalasyna bılik qurǵany týraly málimet bar.
«Demek, 1465 jyly Kereı men Jánibek Ábilhaıyr hannan bólinip ketti delingen eski paradıgma jańa derektermen túbegeıli kúırep otyr», - dedi ol.
Onyń aıtýynsha, ǵalymdar jyl saıyn jańa faktilerdi taýyp jatyr. Sondyqtan búginde bul derekterdi ózektendirip, olardy Qazaqstan tarıhy oqýlyǵyna der ýaqytynda engizý barynsha ózekti.
