Qazaq sportshy Qytaı quramasy sapynda Phenchhan Olımpıadasyna qatysady
Qytaıdyń halyq saıtynyń habarlaýynsha, Qytaı ulttyq quramasyn Phenchhandaǵy qysqy Olımpıada oıyndaryna saltanatty shyǵaryp salý rásimi 31 qańtar kúni Beıjiń qalasynda ótip, dodada baq synaıtyn Qytaı sportshylarynyń tolyq tizimi jarııalandy. Qytaı ulttyq quramasyndaǵy 82 sportshy Phenchhanda qysqy sporttyń 5 túrinen baq synaıtyn bolady.
Shyńjańda týyp ósken ulty qazaq sportshy Arshynǵazy Shákenuly baıraqty básekede konkımen júgirý sportynan 1500 metrlik synda óner kórsetetin bolady.
Shyńjań konkımen júgirý quramasynyń bas bapkeriniń aıtýynsha, 23 jastaǵy qandasymyz qurama sapyna 2010 jyly qosylyp, bul kúnde Qytaıdyń ishki birinshiligi boıynsha qurylǵan reıtıngide birinshi orynda tur.
Sondaı-aq onyń atap ótýinshe, sońǵy 24 jylda Shyńjańnan qysqy Olımpıada oıyndaryna sportshylar qatyspaǵan. Phenchhandaǵy oıyndarǵa 4 sportshy lıtsenzııa aldy.
Aıta keteıik, Arshynǵazy 2017 jyly 28 jeltoqsan kúni Qytaıdyń konkımen júgirý sportynan ishki birinshilikte Shyńjań quramasynyń ózge taǵy eki sportshysy - Almas Qaqanbaıuly jáne Dástúr Tursynhanulymen birge komandalyq synda jeńimpaz atandy.
Eske salaıyq, XXIII qysqy Olımpıada oıyndary aqpannyń 9-25 kúnderi aralyǵynda Phenchhanda ótedi.
