Qazaq sportshylaryn osy aptada qandaı jarystar kútip tur
ASTANA. KAZINFORM — Qazaq sportshylaryn 24 aqpan men 2 naýryz aralyǵynda qandaı jarystar kútip turǵany belgili boldy.
QR Sport komıtetiniń habarlaýynsha, osy aptada qazaq sportshylary birqatar mańyzdy jarysta baq synap, óz sheberlikterin kórsete alady.
Naqtyraq aıtsaq, 24 aqpan — 9 naýryz aralyǵynda shańǵymen tuǵyrdan sekirýden álem chempıonaty ótedi. Onda el namysyn 4 otandasymyz qorǵaıdy. Atalǵan báseke Norvegııanyń Tronheım qalasynda ótedi.
24 aqpan — 3 naýryz aralyǵynda Majarstannyń Debretsen qalasynda mánerlep syrǵanaýdan jasóspirimder arasyndaǵy álem chempıonaty ótedi. Álemdik dodaǵa el quramasynan 2 sportshy qatysady.
23 aqpan — 7 naýryz aralyǵynda Shvetsııanyń Estersýnd qalasynda bıatlonnan jasóspirimder men jastar arasyndaǵy álem chempıonaty ótpek. Onda atalǵan birinshilikke 11 otandasymyz synǵa túsetin bolady.
24-28 aqpan aralyǵynda sporttyq jáne jaýyngerlik sambodan Qazaqstan chempıonaty jalaýyn kótermek. Aqtaý qalasynda ótetin ishki birinshilikte 17 óńirden 110 sportshy baq synaıdy dep josparlanyp otyr.
25-28 aqpan aralyǵynda Astana qalasynda qoıan-qoltyq urystan el birinshiligi ótedi. Chempıonatqa elimizdiń barlyq óńirinen 400 sportshy qatysady dep kútilýde.
26 aqpan — 2 naýryz aralyǵynda short-trekten jasóspirimder arasyndaǵy álem chempıonatynyń alaýy jelbireıdi. Kanadanyń Kalgarı qalasynda ótetin baıraqty básekede el namysyn 8 sportshy qorǵamaq.
26-27 aqpan aralyǵynda erkin kúresten Muhamet Malo halyqaralyq reıtıngtik týrnıri ótedi. Albanııanyń Tırana qalasynda ótetin dodaǵa Qazaqstan quramasynan 10 balýan el namysyn qorǵaıdy.
26 aqpan — 4 naýryz aralyǵynda Frantsııa astanasy Parıjde kórkem júzýden Álem kýbogi (1 kezeń) ótedi. Bul básekede Qazaqstannan 9 sportshy synǵa túspek.
26-28 aqpan aralyǵynda Astana qalasynda Armrestlıngten Qazaqstan chempıonaty ótpek. Saıysqa 17 óńirden 300 sportshy qatysady.
28 aqpan — 6 naýryz aralyǵynda Italııanyń Tarvızıo qalasynda taý shańǵysy sportynan jasóspirimder arasyndaǵy álem chempıonatynyń jalaýy jelbireıdi. Onda el namysyn 2 sportshy qorǵaıdy.
1-3 naýryz aralyǵynda Germanııanyń Oberhof qalasynda shańǵymen tuǵyrdan sekirýden FIS kýbogi ótedi. Atalǵan básekede 4 otandasymyz baq synaıdy.
1-7 naýryz aralyǵynda Shymkent qalasynda para sadaq atýdan el chempıonaty ótpek. Іshki birinshilikke ár óńirden 60 sportshy qatysady dep kútilýde.
Buǵan deıin batýttaǵy gımnastıkadan el quramasy Bakýde kúmis medal enshilegenin habarlaǵan edik.
Al ótken aptada qazaq sportshylary tómendegideı kórsetkishterge qol jetkizdi:
Mánerlepsyrǵanaý: Ońtústik Koreıanyń Seýl qalasynda ótken tórt qurlyq chempıonatynda Mıhaıl Shaıdorov top jardy. Otandasymyz qossaıysta 285.10 upaı jınady. Osydan dál 10 jyl buryn marqum Denıs Ten de Seýl tórinde chempıon atanǵan edi.
Sporttyqgımnastıka: Germanııanyń Kotbýs qalasynda máresine jetken Álem kýboginiń birinshi kezeńinde Mılad Karımı altyn medal jeńip aldy. Erkin jattyǵýdyń fınalynda ol 14.133 upaı jınady.
Konkımenjúgirý: Polshanyń Tomashýv-Mazovetsk qalasyndaǵy Álem kýbogi kezeńinde Evgenıı Koshkın 500 metr qashyqtyqta úzdik shyqty. Qazaqstan eń keıingi ret Álem kýbogi kezeńinde altyndy 2011 jyly komandalyq sprıntte jeńip alǵan edi. Sondaı-aq Qazaqstan áıelder quramasy komandalyq synda úshinshi oryn aldy.
Nysanakózdeý: Taılandtaǵy Azııa kýboginde ulttyq qurama sportshylary 12 altyn, 9 kúmis, 4 qola medalmen jalpykomandalyq esepte 1-oryndy ıelendi.
Sadaqatý: Taılandtaǵy Azııa kýbogi kezeńinde Ulttyq qurama sportshylary úsh kúmis medal oljalady.
Dzıýdo: Polsha astanasy Varshavadaǵy Eýropa kýboginde sportshylarymyz 1 altyn, 1 kúmis medal jeńip aldy. Erler arasyndaǵy 60 kg deıingi salmaqtyń fınalynda eki otandasymyz Sherzod Davlatov pen Baqytjan Amannyń joly túıisip, Sherzodtyń mereıi ústem boldy.
Karate: Birikken Arab Ámirlikteriniń Fýdjaıra qalasynda ótip jatqan jastar arasyndaǵy A serııasy jarysynda Qazaqstan komandasy 8 júlde jeńip aldy. Fýdjeıradaǵy dástúrli jarys búgin aıaqtalady.
Batýttaǵygımnastıka: Qazaqstan quramasy Ázerbaıjannyń Baký qalasynda ótken Álem kýbogi kezeńinde kúmis medal enshiledi.