Qazaq sportshylaryn aqpan aıynda qandaı jarystar kútip tur
ASTANA. KAZINFORM – Qazaq sportshylaryn aqpan aıynda bir qatar mańyzdy dodalar kútip tur.
Atap aıtsaq, aqpan aıynda Ulttyq qurama sportshylary sporttyń 18 túri boıynsha 17 lıtsenzııalyq jarysta óner kórsetedi. Dzıýdo, semserlesý, sporttyq gımnastıka, aýyr atletıka jáne batýttaǵy gımnastıka boıynsha synǵa túsetin sportshylar Parıj Olımpıadasynyń joldamasyn reıtıngtik upaı beretin jarystarǵa qatysady. Sonymen birge, sý sporty túrleri, boks, jeńil atletıka ókilderi tórtjyldyqtyń basty jarysyna irikteý týrnırlerinde baq synaıdy.
Qazirgi tańda Qazaqstan ulttyq quramasynyń qorjynynda Parıj Olımpıadasynyń 19 lıtsenzııasy (sporttyń 8 túrinen) bar (sadaq atý – 4, veloshosse – 3, nysana kózdeý – 5, qazirgi bessaıys – 2, boks – 2, grek-rım kúresi – 1, erkin kúres – 1, sporttyq gımnastıka – 1). Olımpııa oıyndaryna deıin 69 lıtsenzııalyq jarys qaldy. Onyń ishinde 5 álem chempıonaty, 7 Azııa chempıonaty jáne 57 reıtıngtik týrnır bar.
«Bıylǵy jyldyń basty sporttyq oqıǵasy dep 26 shilde men 11 tamyz aralyǵynda Parıjde ótetin jazǵy Olımpııa oıyndaryn aıtýǵa bolady. Ár tórt jylda bir ret ótkiziletin Olımpıadaǵa álemniń 205 elinen 10 myńnan astam sportshy qatysady dep josparlanǵan. Parıjdegi dodada 32 sport túrinen 329 medal jıyntyǵy sarapqa salynady. Qazaqstan ulttyq quramasy Olımpıadaǵa sporttyń 20 túrinen qatysýdy josparlap otyr. Sondyqtan qazirgi tańda basty maqsat – qysqa merzimde meıilinshe kóp lıtsenzııa alý. Qurama kóshbasshylary ár sport túriniń ereksheligi, sportshynyń qajettiligi, medıtsınalyq-bıologııalyq turǵyda qamtamasyz etilgeni, onyń ishinde fızıoterapııa, ońaltý men jaraqattardyń aldyn alý, psıhologııalyq qoldaý jáne jarysqa daıyndyq kezinde kúızelisti jeńý sııaqty jaǵdaılar eskerilgen jeke jospar boıynsha daıyndalady», - dedi týrızm jáne sport mınıstri Ermek Marjyqpaev.
Aıta keteıik, búgin Frantsııa astanasy Parıjde dzıýdodan álemdik Grand Slam týrnıriniń jalaýy jelbiredi. Astana qalasynda kúres túrlerinen el birinshiligi ótip jatyr.
