Qazaq sportshylary Olımpıadaǵa deıin dopıngke qarsy qansha ret synama tapsyrady
ASTANA. KAZINFORM – Búgingi tańda qazaq sportshylary Parıjde ótetin XXXIII jazǵy Olımpıada oıyndaryna daıyndyq jolynda aıanbaı ter tógýde. Biri – joldama úshin talasyp jatsa, endi biri – joldamany jeńip alyp, tórtjyldyq basty dodaǵa daıyndyqty bastap ketken.
Qazirgi tańda sportshylarymyz fızıkalyq dene daıyndyǵymen qatar dopıngke qarsy talaptardy da esten bir sát shyǵarýǵa quqysy joq. Sebebi, osyǵan deıin qanshama sportshylarymyz Olımpıadanyń jeńis tuǵyryna shyǵyp, artynan júldelerinen de, ataq-abyroıynan da aıyrylyp qaldy.
Osy oraıda, agenttik tilshisi QR Dopıngke qarsy ulttyq ortalyǵynyń basshysy Maıra Baqashevamen tildesip, Olımpıada aldynda sportshylarymyz jarysqa dopıngsiz barýy úshin qandaı jumystar atqarylyp jatqanyn surap, bildi.
«Biz sportshylarymyzdyń Parıjde ótetin Olımpıada jáne Paralımpıada oıyndaryna dopıngsiz qatysýyna bar kúshimizdi salyp jatyrmyz. Basty dodaǵa daıyndyq aıasynda Qazaqstannyń Dopıngke qarsy ulttyq ortalyǵy (QazDQUO) sportshylardy dopıngke qarsy oqytýǵa jáne olardy testileýge baǵyttalǵan is-sharalardy ótkizýde. Dopıngke qarsy aǵartý semınarlary sportshylarǵa, jattyqtyrýshylarǵa, sport dárigerlerine jáne qosymsha sport qyzmetkerlerine jarys jáne jarystan tys kezeńderde uıymdastyrylady. Olımpıadaǵa, Paralımpıadaǵa baratyn sportshylarmen biz jeke-jeke kezdesýlerdi mindetti túrde ótkizip jatyrmyz. Sportshylar ortalyqtyń resmı saıtynda tegin bilim alý kýrstantarynan ótýge mindetti. Ony aıaqtaǵan soń, rastaý sertıfıkaty beriledi. Sondaı-aq, Dúnıejúzilik dopıngke qarsy agenttigi (DDQA) Olımpıada oıyndaryna daıyndalý úshin ADEL bilim berý kýrsyn ázirledi. Osy boııynsha barlyq jumystar atqarylýda», - dep atap ótti QR Dopıngke qarsy qlttyq ortalyǵynyń basshysy.
Sonymen qatar, Olımpıadaǵa joldam jeńip alǵan qazaq sportshylary jarysqa deıin mindetti túrde úsh ret dopıng baqylaýdan ótetinin aıtty.
«QazDQUO jyl saıyn testileý josparyn júzege asyrady jáne ony jasaǵan kezde qazaqstandyq sportshylardyń halyqaralyq jarystarǵa, sonyń ishinde Azııa oıyndary men Olımpıadalarǵa daıyndyǵy men qatysýyn eskeredi. Dopıngke qarsy ulttyq ortalyq kúntizbelik jyldyń basynan bastap mańyzdy jarystardyń árbir qatysýshysyn keminde 3 ret dopıng baqylaýdan ótkizedi. Bul - Halyqaralyq Olımpıada komıtetiniń, DDQA jáne QR Týrızm jáne sport mınıstrliginiń talaby. Sportshylardy Halyqaralyq federatsııa da teksere alady. Olar da óz táýelsiz testileýin júrgizedi», - dedi QR Dopıngke qarsy Ulttyq ortalyq basshysy Maıra Baqasheva.
Esterińizge sala keteıik, XXXIII jazǵy Olımpıada oıyndary 2024 jyldyń 26 shildesi men 11 tamyzy aralyǵynda ótedi.
