Qazaq sportyn búkil álem moıyndaıtyn boldy – Toqaev
ASTANA. KAZINFORM – Ulttyq sport túrlerin damytýǵa erekshe nazar aýdarý Úkimet pen ákimdikterdiń aldynda turǵan asa mańyzdy mindet. Bul týraly VI Dúnıejúzilik kóshpendiler oıyndary jeńimpazdaryn marapattaý rásiminde Memleket basshysy Qasym-Jomart Toqaev aıtty.
— Bárimiz ulttyq sport túrlerin damytýǵa erekshe nazar aýdarýymyz kerek. Bul — Úkimet pen ákimdikterdiń aldynda turǵan asa mańyzdy mindet. Qazir osy salada jumys isteıtin 30-dan astam arnaıy mekeme bar. Astanada Ulttyq sport ýnıversıteti ashyldy. Bul oqý orny sport salasyndaǵy kásibı kadrlardy daıarlaýǵa sheshýshi úles qosady dep josparlap otyrmyz. Ulttyq jáne at sporty túrleri ortalyǵy da tabysty qyzmet ete bastady. Elimizde jyl saıyn qazaq kúresi, toǵyzqumalaq, asyq atý, kókpar, báıge jáne basqa da sport túrleri boıynsha myńnan astam jarys ótkiziledi. Ulttyq sport túrleriniń festıvali, «Aq bıdaı» aýyl oıyndary, «Qazaqstan barysy» dodasy turaqty túrde uıymdastyrylady, — dedi Memleket basshysy.
Prezıdent ulttyq sport pen olımpıadalyq sport túrleriniń mártebesi zań júzinde teń mártebege ıe bolǵanyn basty jetistik retinde atady.
— Búginde qazaq sportynyń bedeli zor. Ony búkil álem moıyndaıtyn boldy. Qazaqstan sportshylary árdaıym úzdikter qatarynda. Kúni keshe dańqty sportshymyz Elena Rybakına tennısten álemniń birinshi raketkasy atandy. Bul shyn máninde úlken jetistik. Men Elena Rybakınany quttyqtadym. Onyń eńbekqorlyǵy men sheberligin atap óttim. Boıyndaǵy jeke mádenıetiniń joǵary ekenine erekshe baǵa berdim, — dedi Qasym-Jomart Toqaev.
Aıta keteıik, Qazaqstan quramasy 31 tamyz ben 6 qyrkúıek aralyǵynda Qyrǵyzstanda ótken VI Dúnıejúzilik kóshpendiler oıyndarynda 74 medal jeńip aldy.
