Qazaq sport jáne týrızm akademııasy «Gorelnık» sport keshenin akademııa menshigine qaıtarýdy talap etip otyr
ALMATY. Mamyrdyń 16-sy. QazAqparat /Erbol Azanbek/ - Alpınıster daıyndaýǵa arnalǵan «Gorelnık» taý sporty kesheni Qazaq sport jáne týrızm akademııasyna qaıtarylýy tıis. Búgin Almatyda Sport jáne týrızm akademııasynyń (QazSTA)basshylyǵy baspasóz máslıhatyn ótkizip, osyndaı málimdeme jasady.
Akademııanyń rektory Qaırat Zakarıanovtyń aıtýynsha, «Gorelnık» taý sporty kesheni 2001 jylǵa deıin Akademııa menshiginde bolǵan. 2001 jyly Akademııanyń burynǵy dırektorlar keńesiniń sheshimimen «Gorelnık» JShS-na berilgen.
«Satý kelisimshartyna sáıkes, «Gorelnık» JShS basshylyǵy bazany QazSTA stýdentterine oqý- jattyǵýy úshin tegin berip turýy tıis bolatyn. Alaıda, birneshe jyldan beri keshen basshylyǵy kelisimshartty oryndaýdan bas tartyp otyr. Qazir baza ǵımarattary men múlki talan-tarjyǵa túsip ketken. Stýdentterdiń jattyǵýy úshin biz baza mańynda shatyr tigip, jańa qural-jabdyq alyp jatyrmyz. Jalpy alǵanda, kezinde búkil odaqqa aty málim «Gorelnık» bazasy óz jumysyn toqtatty deýge bolady. Osyǵan oraı biz keshenniń Akademııaǵa qaıtarylýyn talap etemiz», dedi rektor.
Atalǵan baza 1932 jyly alpınısterdi daıyndaý maqsatynda qurylǵan. Uly Otan soǵysy jyldary Kavkaz taýlaryndaǵy urys taǵdyryn sheshken 12 myńnan astam atqysh-alpınısterdi daıyndap shyǵarǵan. Odan beri 2 myńnan astam taý týrızmi men alpınızm boıynsha nuqsaýshy, jattyqtyrýshylardy daıyndap shyǵarǵan. 1945 jyldan beri Qazaqtyń dene shynyqtyrý ınstıtýynyń ustazdarymen osy bazada myńnan astam mamandar daıyndalǵan. Táýelsizdik alǵannan bergi ýaqytta Qazaq sport jáne týrızm akademııasynyń stýdentteri daıyndalatyn baza retinde jumys istep kelgen edi.
