Qazaq soqyrlar qoǵamynda daý-damaı órship barady - respýblıkalyq basylymdarǵa sholý
***
Álemdik qarjy daǵdarysy bastalǵaly bergi úsh jyldyń aqyryna qaraı Eýropa qurlyǵy uıqydan shyǵa almaıtyndaı tuıyqqa bireldi. Osynaý sharasyz shatqaıaq sońǵy kúnderi Grekııa, Ispanııa, Portýgalııa sekildi elderde ereýilder men mıtıngilerdiń órshýine sebepker boldy. Bul memleketterde ulttyq úkimettiń orasan zor daǵdarysty aýyzdyqtaýǵa baǵyttalǵan, ıaǵnı memlekettik sektordy qarjylandyrýdy kúrt qysqartýdy kózdeıtin qadamdary jergilikti turǵyndar tarapynan narazylyq týǵyzdy. Mine osy kári qurlyqtaǵy dúrbeleń jaıy «Egemen Qazaqstan» gazetiniń búgingi sanyndaǵy «Eýropa jurty eleńdep tur» degen taqyryptaǵy maqalada keńinen baıandalǵan. «Jalpy, Eýropada tereńge tamyr baılaǵan daǵdarystyń dúrmegine túsip, bıýdjet tapshylyǵyn bastan keship otyrǵan elderdiń sany bulardan áldeqaıda kóp. Sarapshylar bul qatardan sondaı-aq Italııa, Frantsııa, Irlandııa sekildi elderdi de kórýde. Bir sózben qaıyrǵanda, qazirgi tańda búkil Eýropanyń jurty erteńine elige qarap, eleńdep otyr», - dep jazady basylym.
***
«Aıqyn» gazetiniń jazýynsha, qazirgi kezde er adamdardyń densaýlyǵy memleket tarabynan alańdaýshylyq týdyratyn úlken problemaǵa aınalyp otyr. Osyǵan baılanysty dárigerler erkekterdiń densaýlyǵyna memleket tarabynan kóńil bólý, bedeýlikke qarsy sharalar jasaý kerektigin aıtyp, dabyl qaǵýda. Máselen, «Jarbosynov atyndaǵy ǵylymı ýrologııa ortalyǵy» AQ bas dırektory Myrzakárim Alshynbaevtyń aıtýynsha, tekserilgen 24 myń er adamnyń tek 30 paıyzy bala jasaýǵa jaramsyz bolyp shyqqan. Medıtsınalyq tekserý barysynda erkekterdiń 50-60 paıyzy ár deńgeıdegi erektıldi dısfýnktsııamen, 30 paıyzy belsizdikpen aýyratyny anyqtalǵan. Alaıda olardyń 8 paıyzy ǵana dárigerge qaralǵan, qalǵandary júreksinip nemese uıalyp júre bergen. Maqala «Belsizdik pen bedeýlik, odan qutylatyn jol bar ma?» degen taqyryppen berilgen.
***
«Qazaq soqyrlar qoǵamynda daý-damaı órship barady», dep jazady «Vremıa» gazeti búgingi sanyndaǵy «Voına vslepýıý» degen taqyryptaǵy maqalada. Basylymnyń atap ótýinshe, opponentter Qazaq soqyrlar qoǵamynyń prezıdenti Baıbolat Áýbákirovti taý baýraıyndaǵy kózjanarlary boıynsha múgedekterge arnalǵan demalys úılerin aıdaladaǵy úılerge aıyrbastap jiberdi ári tek óziniń bas paıdasy úshin ǵana dep kinálap otyr.
«Vremıa» gazetiniń jazýynsha, Qazaqstannyń Velosport federatsııasy veloshabandoz Aleksandr Vınokýrov pen Aleksandr Kolobnevqa qatysty Halyqaralyq velesıpedshiler odaǵynyń (UCI) tekserýin jiti qadaǵalaýda. «Tekserýdiń ótýi aıtarlyqtaı oqıǵa emes. Óıtkeni úlken sportta mundaı jaǵdaılar kún saıyn oryn alyp jatady. Biz UCI-men tyǵyz baılanysta jumys isteýdemiz ári onyń sheshimin kútetin bolamyz. Biz kez kelgen jaǵdaıda da Halyqaralyq velesıpedshiler odaǵynyń barlyq quqyqtyq normalary men reglamentterin qatań saqtaıtyndyǵymyzdy basa aıtqym keledi», - dedi QR Velosport federatsııasynyń vıtse-prezıdenti Allen Shaıjúnisov.
***
«Qazaqstanǵa resmı saparmen Belarýs Respýblıkasynyń Premer-mınıstri Mıhaıl Mıasnıkovıch keldi. Keshe onymen QR Úkimet basshysy Serik Ahmetov kezdesti, odan keıin olar qazaqstan - belarýs bıznes forýmyna qatysty», - dep jazady «Kazahstanskaıa pravda» gazeti. Basylymnyń atap ótýinshe, kúnniń alǵashqy jartysynda Úkimet úıinde ótken kelissózder nátıjesinde birqatar yntymaqtastyq qujatyna qol qoıylǵan. «Bizderdiń aramyzdaǵy taýar aınalymy shamamen 800 mln. dollardy quraıdy. Al elderimizdiń zor áleýeti úshin, árıne, bul jetkiliksiz. Sondyqtan da eki eldiń de úkimetterine taıaý ýaqytta taýar aınalymyn mıllıardqa, jetkizý jáne odan ári ony eki, tipti úsh ese ulǵaıtý mindeti qoıyldy», - depti S.Ahmetov baspasóz máslıhaty barysynda.
