Qazaq sharýalarynyń quryltaıy ótip jatyr
ASTANA. KAZINFORM – Astanada «Azyq-túlik qaýipsizdigi» atty qazaq sharýalarynyń quryltaıy ótip jatyr. Osymen úshinshi ret uıymdastyrylǵan quryltaıda aýyl sharýashylyǵy salasyndaǵy máseleler jan-jaqty talqylanyp jatyr.
Quryltaıǵa elimizdiń túkpir-túkpirinen, shalǵaı aýyldardan 300-ge jýyq sharýa qatysyp jatyr. «Shańyraq» ulttyq agro-qozǵalysy» Respýblıkalyq qoǵamdyq birlestiginiń tóraǵasy Almasbek Sadyrbaı óz baıandamasynda qozǵalystyń júıeli jumysy kóptegen sharýanyń problemasyn sheshýge múmkindik bergenin aıtty.
«Kóbi «Shopan ata» ne tyndyryp jatyr, áıteýir shýlatasyńdar da júrsińder dep surap jatady. Osy ýaqytqa deıin qozǵalys Mańǵystaýdaǵy qýańshylyqtan bastap 40-qa jýyq máseleni sheshýge atsalysty. Bıliktiń nazaryn aýdarta bildi. Buǵan deıin Túrkistan oblysynyń aýyl sharýashylyǵy salasyna jylyna 2 mlrd. teńge qarjy bólinetin. Qazir 8 mlrd. teńge qarajat qarastyrylǵan. Sebebi, biz máseleni kórsettik, taldap berdik, sheshý jolyn kórsettik. Áli de atqarylar sharýa shash-etekten. Ony memlekettik organdarmen birlese sheshý mańyzdy», — dedi A. Sadyrbaı.
Quryltaı barysynda «Shańyraq» ulttyq agro-qozǵalysy» Respýblıkalyq qoǵamdyq birlestiginiń tanystyrylymy boldy. Birlestik Qazaqstannyń jylqy ósirýshiler odaǵy qaýymdastyǵymen, Qazaqstan sý salasynyń ulttyq qaýymdastyǵymen, fermerlik jylyjaılar qaýymdastyǵymen, Túrkistan oblysynyń sharýashylyq ónimin óndirýshiler qaýymdastyǵymen, «Jetisý» qoı sharýalarynyń aımaqtyq qaýymdastyǵymen, QR aýyl sharýashylyǵy óndiristik kooperatıvteriniń qaýymdastyǵymen, Fermer.kz qoǵamdyq birlestigimen memorandýmǵa qol qoıdy.
Memorandým maqsaty — agrosaladaǵy qoǵamdyq uıymdardy biriktirý. Ázirge birlestik quramyna 20-dan astam uıymdar kirip otyr. Birlestik azyq-túlik qaýipsizdigi boıynsha lobbızmge jol bermeı, el múddesin alǵa qoıýdy maqsat etýde.
