Qazaq shabandozy álemdik rekord ornatty
ASTANA. KAZINFORM — Jas shabandoz Ernar Jasuzaq eki attyń ústinde tik turyp, 2 shaqyrymdy saǵatyna 60 km jyldamdyqpen shaýyp ótti. Bul óneri úshin ol Dúnıejúzilik rekordtar kitabynyń GBR keıipkeri atanyp, Qazaqstannyń at sporty tarıhyna jańa beles qosty.
— Jalpy at sportymen 3 jyldan beri aınalysamyn. Bul rekordty ornatý úshin 3 aıdan asa ýaqyt boıy daıyndaldyq. Birtalaı qıyndyq ta boldy. Eń áýeli attarymyz qınaldy. Aıaqtary aýyrǵan kezder boldy. Sátsiz jaǵdaılardyń kesirinen attan da quladym. Tura da almaı qaldym. Biraq alǵa qoıǵan maqsatyma umtylyp, sol qıyndyqtyń bárin eńserý úshin bar kúsh-jigerimdi saldym, — deıdi rekordsmen.
Shabandoz jańa rekordty bir degennen-aq sátti oryndaǵan.
— 20 qyrkúıek kúni bizge tek 2 múmkindik berildi. Biraq birinshi múmkindikten alyp shyqtyq. Dese de oǵan deıin qanshama sátsiz tájirıbeler boldy ǵoı. Bul beleske jetý ońaı bolǵan joq. Qaýipsizdik sharalaryn da eskerdik. Biraq attyń ústinde turǵanda bar jaýapkershilik tek mende bolady. Eki attyń balansyn birdeı etip ustap otyrý, eki attyń ústinde turǵanda basqa jaqqa aýyp ketpeý, attardyń basqa baǵytqa kelip qalmaýy, barlyǵy tek maǵan baılanysty, — deıdi ol.
Ernar Jasuzaq kelesi jyly taǵy da bir rekord ornatýǵa nıetti.
Aıta keteıik, osydan 3 kún buryn Almaty oblysynda álemdegi eń úlken túıe kerýeni júrip ótip, rekord tirkegen edi.