Qazaq saıttarynyń taqyryptary taıaz - zertteý
Forýmnyń birinshi sessııasynda «Minber» jýrnalısterdi qoldaý qorynyń jetekshisi Esengúl Kápqyzy qazaq saıttarynyń negizgi máselelerin atap ótti.
Onyń aıtýynsha, qazaq tildi keńistikte qarjy-ekonomıkalyq materıaldar az. Al saıttardyń ózderi jeńil-jelpi taqyryptardan shyǵa almaı jatady.
«Qazir biz qandaı oqyrmandy tárbıelep otyrmyz? Biz búgingi mańyzdy máselelerdi emes, juldyzdar jáne taǵy basqa sensatsııalyq jańalyqty izdeıtin oqyrmandy tárbıelep otyrǵan sııaqtymyz. Tipti, bes jastaǵy balanyń ózi ánshiniń ómirin bes saýsaǵyndaı bilip otyrady. Biraq ózine qajetti aqparattardy bilmeıdi. Nege? Óıtkeni biz ózimiz qajetti aqparatty bermeımiz», - deıdi E.Kápqyzy.
Zertteýge sáıkes, sońǵy jyldary qazaq saıttarynyń sany ósti. Alaıda olardyń arasynda básekelestik tómen bolyp tur. Sebebi sala-sala boıynsha bólinip, tuşymdy dúnıelerdi jarııalaý jaǵy kenjelep keledi. Qazaq saıttary bir-biriniń aqparattaryn kóshirip basa salady. Sóıtip, kontent birtekti, al qazaq saıttarynyń jeke izdenisi, jeke qoltańbasy joq. Mýltımedııalyq ónimderdi paıdalaný kórsetkishi de tómen.
«Taǵy bir másele ol - taqyryptyń taıazdyǵy. Bul - bizdiń óz qateligimiz. Biz neǵurlym sapaly kontent usynsaq, oqyrmannyń talaby da soǵurlym artady. Sondyqtan taqyryptardyń aıasyn keńeıtý kerek. Bizdiń baıqaǵanymyz, qazaq saıttary kóteretin birneshe taqyryp bar. Ol - áleýmettik máseleler, til máselesi jáne ulttyq másele. Osy taqyryptardyń tóńireginde kóbirek áńgime qozǵaımyz. Al qarjy men ekonomıka salasyna tereńdep ene almaımyz. Negizi, ondaı taqyryptarǵa suranys joǵary», - dep atap kórsetti E.Kápqyzy.
Osy oraıda qor jetekshisi memlekettik tapsyrys máselesine de toqtaldy.
Onyń aıtýynsha, qazaq saıttary memlekettik tapsyrysqa neǵurlym táýeldi bolsa, taqyryp aıasy soǵurlym taryla túsedi.
«Memlekettik tapsyrys bolmasyn demeımiz. Tapsyrysty alý kerek. Biraq osy máseleniń basqa bir joldaryn qarastyrý qajet. Máselen, memlekettiń ishki kontentke aralaspaýy, ishki kontentti basqarmaýy. Óıtkeni búginde biz áleýmettik jelilerden qalyp qoıyp otyrmyz. Qoǵamdyq pikirdi qalyptastyrý jaǵynan buqaralyq aqparat quraldary emes, áleýmettik jelilerdiń úlesi basym bolyp tur», - dedi jýrnalıst Esengúl Kápqyzy.