Qazaq sahnasynyń ańyz tulǵasy - Bıbigúl Tólegenova Almatyda daýys berdi
ALMATY. QazAqparat – KSRO jáne Qazaqstan halyq ártisi Bıbigúl Tólegenova óziniń Konstıtýtsııalyq quqyǵyn paıdalanyp, daýys berdi, dep habarlaıdy Qazaqparat tilshisi.
Búgin Bıbigúl Tólegenova saılaý ýchaskesine barmady. Kóshpeli saılaý komıssııasynyń músheleri Qazaqstannyń halyq ártisiniń úıine daýys berý jáshigin alyp keldi.
Jeztańdaı ánshiniń pikirinshe, saılaý – azamattyq jaýapkershiliktiń kórinisi.
«Meniń oıymsha, prezıdenttikke óz úmitkerligin usyný - óte úlken jaýapkershilik. Biz egemen memleketpiz. Prezıdent mindetine álemdik arenada bizdiń quqyǵymyzdy qorǵaý kiredi», - dedi Bıbigúl Tólegenova.
Sonymen qatar, Almatyda óz saılaý ýchaskelerinde M.Áýezov atyndaǵy Qazaq memlekettik akademııalyq drama teatrynyń akterleri – Qazaqstannyń eńbek sińirgen qaıratkerleri Danagúl Temirsultanova men Azat Seıtmetov, opera ánshisi – Halyq ártisi, Qazaqstannyń Eńbek Eri Álibek Dinishev jáne estrada ánshisi – QR eńbek sińirgen ártisi Aıjan Nurmaǵambetova da daýys berdi.
