Qazaq sahnasynda alǵash ret amerıkandyq dramatýrg Donald Kobýrnnyń «Jynoınaq» dramasy qoıyldy
ALMATY. 4 mamyr. QazAqparat - Keshe Almatydaǵy Muhtar Áýezov atyndaǵy Qazaq memlekettik akademııalyq drama teatrynda »Jynoınaq» dep atalatyn tragıkomedııanyń tusaýkeseri boldy.
Amerıkanyń belgili dramatýrgy Donald Kobýrnnyń álem teatrlarynda kóp qoıylǵan, akterlik oıyndarǵa erekshe múmkindik ashatyn bul dramasy qazaq sahnasynda alǵash ret qoıylyp otyr. Ony qazaqsha aýdarǵan jáne teatr sahnasynda sahnalaǵan qoıýshy-rejısser, Qazaqstannnyń eńbek sińirgen qaıratkeri Ermek Amanshaev. Rejısseri - Alma Kákisheva, kompozıtory - Aqtoty Raıymqulova.
Oqıǵa jelisi qarttar úıinde ótedi. Árqaısysynyń ózindik taǵdyr taýqymeti bir basyna jetip-artylarlyq basty eki keıipker, «tótenshe jaǵdaıdyń jalǵyz emi - djın» dep bos ýaqytynda kartany ermek qylady. Onda djın oıynynan aldyna jan salmaǵan Veller Martın Fonsııa Dorsıdan ońbaı utylady. Bir emes birneshe ret utylǵan onyń boıyn qyzǵanysh oty kernep, Veller Fonsııa aıtqandaı, «aınalasyna zárin shashyp, taǵdyrǵa nala aıtady».
F. Dorsıdiń rólin Qazaqstannyń eńbek sińirgen ártisi Qymbat Tileýova, al V.Martındi Qazaqstanyń halyq ártisteri Tóleýbek Aralbaı, Quman Tastanbekov pen Baýyrjan Qaptaǵaı somdady.
