Qazaq saharasyna Qurban aıt keldi - Qazaqstan musylmandary Dinı basqarmasynyń tóraǵasy
ALMATY. Qarashanyń 27-si. QazAqparat /Erlik Erjanuly/ - Qazaqstan halqyn Qyrǵyzstan, Ózbekstan, Ázirbaıjan memleketiniń bas múftıleri men basqa da din qaıratkerleri telefon shalyp, jedelhat joldap qasıetti Qurban aıtpen quttyqtap jatyr. Bul týraly Qazaqstan musylmandary Din basqarmasynyń tóraǵasy, Bas múftı Ábsattar qajy Derbisáli búgin Almatyda Ortalyq meshitte aıt namazy kezinde aıtty,
dep habarlaıdy QazAqparat.
"Qurban aıt merekesi kezinde aýrý-syrqaý kisilerge baryp kóńilin surap, jylaǵandy jubatyp taıanysh bolý, tipti bireýdiń mańdaıynan sıpap arqasynan qaǵyp, jyly sóz aıtsańyz da saýap. Búgingi aıt kúngi nıetterińiz ben shalatyn qurbandyqtaryńyzdy jaratýshy ıemiz qabyl etsin. Qajylyq paryzyn ótep júrgen jáne ózge eldegi baýyrlarymyz Otanyna, eline aman-esen oralýyna Alla násip etsin. Qasıetti merekemiz qutty da, múbárak bolyp árbir otbasyna yntymaq pen bereke bersin. Elim-jerim, Otanym-halqym, dinim dep júrgen Memleket basshysy aman bolsyn. Keler jyldardaǵy aıt merekelerine, dinimizdiń merekelerine, halqymyzdyń merekelerine, memleketimizdiń merekelerine tórt kózimiz túgel, aman-esen jetýdi Alla taǵala násip etsin", dedi Ábsatar qajy Derbisáli.
Bas múftı sondaı-aq, osy sátti paıdalanyp, aıt namazyna jınalǵan barsha qaýymdy birneshe kúnderden keıin jeltoqsannyń 16-synda kele jatqan memleketimizdiń týǵan kúni - Táýelsizdik kúnimen quttyqtady. Sondaı-aq Alla taǵala táýelsizdigimizdi baıandy etsin, halqymyzdy budan bylaı eshkimge táýeldi, kiriptar etpesin. Qazaq dalasy máńgi baqı azat, yntymaq-birlikte, aýyzbirlikte elimizdiń kórkeıýin, álemde aldyńǵy qatarly elge aınalýyn Alla taǵala bárimizge násip etsin dep tilek aıtty.
