Qazaq rýhyn álemge tanyttyq – «Suńqar» jasaǵynyń kapıtanymen suhbat
Dýbaıda ótken «The UAE SWAT Challenge 2025» arnaıy maqsattaǵy bólimsheler saıysynda Qazaqstannyń 5 komandasy alǵashqy ondyqqa ilikti. Al Іshki ister mınıstrliginiń «Suńqar» jasaǵy saıystyń kúmis júldegeri atanǵan bolatyn. Osy oraıda komanda kapıtany Meırambek Jaılaýbaevpen suhbattasýdyń sáti tústi.
– «The UAE SWAT Challenge 2025» saıysynan oljaly oraldyńyzdar. Jarysqa daıyndyq qalaı júrdi? Bul «Suńqar» komandasynyń áskerılerge arnalǵan baıqaýǵa alǵash qatysýy ma?
– Salalyq saıys áskerı qurylymdy shyńdaıdy emes pe, bul jolǵy baıqaý da «Suńqar» arnaıy maqsattaǵy jasaǵy úshin tájirıbege aınaldy. Áýelden komanda jan-jaqty daıyndyq júrgizip, ujymdyq strategııa qurdy. Árbir qatysýshy ózine júktelgen tapsyrmany kásibı sheberlikpen oryndaǵanyn aıta ketken jón. Muny sheteldik áriptesterimiz ben BAQ-tyń bergen baǵasynan ańǵardyq.
Onyń ústine «The UAE SWAT Challenge 2025» baıqaýyna alǵash qatysýymyz emes. 2024 jyly saıysta boı kórsettik. Ol kezde saıystyń bel ortasyna deıin alǵashqy orynda kóringenimizben, qorytyndy esepte VII oryn buıyrdy. Oǵan komanda múshesiniń jaraqat alýy sebep bolǵan edi. Aıta keterligi, tóreshiler komandany jarystan shyǵarmaýy úshin jaraqat alǵan áskerı qyzmetker aıaǵynyń synǵanyna qaramastan jattyǵýdy sońyn jetkizgen bolatyn. 74 komandanyń ishinde úzdik ondyqqa ený kóńil kónshitkeni ras, dese de qaıta aınalyp aldyńǵy qatarǵa qosylatynmyzǵa senim joǵary boldy.
Bıyl ketken eseni qaıtarý maqsatynda tyńǵylyqty daıyndyq júrdi. Komanda óz qarý-jaraǵy, qajetti tehnıkalyq bazasymen Dýbaıǵa attanyp, jeńiske laıyq ekenin dáleldedi. Qazaqtyń jaýyngerlik rýhy, áskerı jiger, azamat boıyndaǵy kúsh-qýatty álemge tanyttyq.
– Komanda quramynda tájirıbeli mamandar jetkilikti sekildi. Komanda quramyna irikteý qalaı júrgizildi, saıysqa qansha maman bardy?
– Іshki ister mınıstrliginiń «Suńqar» jasaǵynda bilikti maman jetkilikti. Jaýyngerler quramy tolyq, bári tájirıbeli. Sondyqtan komanda quramyn irikteý barysynda qıyndyq týǵan joq. Álemdik arenada el namysyn qorǵap júrgen jankeshti jaýyngerler ázirligin kórsetip, 14 áskerı jarysta baryn saldy. Jeńiske degen umtylys synaqtan súrinbeı ótýimizge sep bolǵandaı.
– Qytaılyq komanda jalpy esepte kósh basynda bolǵanyn kórdik. Jeńimpaz komandanyń qandaı artyqshylyǵy boldy?
– Aldymen atalǵan jarys áskerı mamannan qandaı mashyqty talap etetinin ańǵarýymyz kerek. Saıysta tek bilekti jeńbeıdi, taktıkalyq sheshim men ujymnyń birlesken áreketi mańyzdy. Dýbaıǵa barar aldynda kúndelikti jeke qurammen tárbıe jumysyn, jaýyngerlik daıarlyq júrgizildi. Komandanyń psıhologııalyq ahýaly, kúsh-jigeri baqylaýda boldy. Osy mashyqtardy jetildirý arqyly alǵa jyljydyq. Onsyz eshqandaı nátıje bolmaıdy.
QHR komandasynyń erekshiligine kelsek, men baıqaǵan birneshe sebepti ataıyn. Olarda oqý-daıyndyq ortalyǵynyń materıaldyq jabdyqtalýy joǵary deńgeıde. Jasaqtyń shtattyq sany da kóp. Oǵan qosa komanda músheleri farmatsevtıkalyq dárýmenderdi turaqty qabyldap, qarý-jaraǵyn saqadaı saı ákelgen. Munyń barlyǵy janama faktor bolǵanymen, kózge kórinetin artyqshylyq dep sanaımyn. Al jaýyngerlik daıarlyq turǵysynan bizden artyqshylyǵy joq. Sebebi «Suńqar» jasaǵy qarsylastarymyzǵa qajetti toıtarys bere bildi.
– Saıysqa qazaqstandyq ózge kúshtik qurylymdar komanda qosqanyn baıqadyq. Saıys barysynda ózara báseke boldy ma?
– «The UAE SWAT Challenge 2025» sharasyna Qazaqstannan birneshe komandanyń qatysýy – sala damýynyń kórinisi. ıAǵnı, kúshtik qurylymdar derbes komanda jasaqtap, ózara básekege túsetin deńgeıge jetti degen sóz. Mundaı qolaıly jaǵdaıǵa mınıstrlik tarapynan júrgizilgen reformalar, áskerı mektepterdiń básekege ilesý qabileti sep bolǵandaı.
Jarys barysynda qazaqstandyq áriptesterimizben qatar óner kórsetkenimizge qýanyshtymyz. Shetelde el namysyn qorǵaý abyroıly mindet ekeni anyq. Bul mindetti qaı qurylym moınyna alǵany mańyzdy emes, bastysy – sapaly jumys pen oń nátıje.
P.S. Buǵan deıin Memleket basshysy Qasym-Jomart Toqaev «THE UAE SWAT Challenge 2025» saıysynda top jarǵan kúshtik qurylym ofıtserlerin marapattaǵan bolatyn.