«Qazaq radıosynyń Qalqamany edi...» - Kúıshi ári sazger Q. Júnisbekov týraly bir úzik syr
ASTANA. QazAqparat - Qazaq radıosynyń ardageri, kúıshi ári sazger Qalqaman Júnisbekov osy ujymnyń mýzyka redaktsııasynda 40 jyl boıy úzdiksiz eńbek etip, qurmetke bólengen óner adamy edi.
Osy ýaqyt aralyǵynda qazaq jýrnalıstıkasyna, sondaı-aq qazaq mádenıetine, ónerine kúsh-jigerin jumsap, ondaǵan ádebı-mýzykalyq habar uıymdastyra bildi.
Qalqaman Júnisbekov 1978 jyldary «Ánge sapar» radıofestıvalimen Qazaqstannyń túkpir-túkpirin aralap, el ishindegi týma daryn ıeleriniń ónerin arnaıy «Tonvagen» avtokólik quralǵy arqyly jazyp ákelip, Qazaq radıosynyń altyn qoryn tolyqtyrǵan-dy. Ol kisi osy ýaqyt aralyǵynda talaı óner ıeleriniń baǵyn ashyp, halyqqa tanymal bolýyna ter tókti, uzaq jyl qazaq óneriniń órkendeýine ter tókti.
Qalekeń 2004 jyly óziniń 60 jasqa tolǵan mereıtoıynda Almaty qalasyndaǵy «Qazaqkontsert» birlestiginde «Táýelsiz Qazaqstanym meniń» degen aıdarmen shyǵarmashylyq keshin ótkizdi.
Sazger Qalqaman Júnisbekovtiń Nurǵısa Tilendıev atyndaǵy «Otyrar sazy» orkestriniń oryndaýyndaǵy «Abaı tolǵaýy», «Kúı kúmbezi Táttimbet», «Saǵynysh sazy», «Balbóbek baldyrǵan», «Qalqaman qosbasar» kúılerimen qosa ulttyq rýhymyzdy asqaqtatatyn «Táýelsiz Qazaqstan» kúı -dastany basshymyz Nursultan Ábishuly Nazarbaevqa arnalǵan shyǵarmasy, sondaı-aq Serikbaı Ospanovtyń óleńine jazylǵan «Saryarqa» áni, óz óleńine jazylǵan «Myńaralym» ánin tanymal ánshi Ramazan Stamǵazıev oryndasa, Sulýshash Nurmaǵambetovanyń oryndaýynda Jarasbaı Nurqanovtyń óleńine jazylǵan «Naýryz - dýman», Serikbaı Ospanovtyń óleńine jazylǵan «Ana janary», Gúlmaıdan Súndetovanyń oryndaýynda Bákir Tájibaevtyń óleńine jazylǵan «Altyn toı tolǵaýy», Qazaqstannyń eńbek sińirgen qaıratkeri Rymkesh Jumadilovanyń oryndaýynda Kákimbek Salyqovtyń óleńine jazylǵan «Aqqý jetken», Jolaman Qujymanovtyń oryndaýynda Tynyshbaı Rahymnyń óleńine jazylǵan «Qamajaı dáýren qalqamaı» ánderi Qazaq radıosynyń altyn qorynda saqtaýly.
Qalqaman Júnisbekovtiń kóp jylǵy eńbegi adal baǵalanyp , «Televızııa jáne radıo» úzdik qyzmetkeri. «Mádenıet qaıratkeri» belgisimen jáne «Qazaqstan Táýelsizdigine 10 jyl» medalimen jáne Qazaq radıosynyń 90 jyldyǵyna oraı 2011 jyldyń jeltoqsan aıynda «Qazaq radıosynyń ardageri» medalimen marapattaldy.
Ol 2004 jyldan «Nur Otan» partııasynyń múshesi boldy.
Qazaq radıosynyń ardageri Qalqaman Júnisbekovtiń ózi dúnıeden ótse de uzaq jylǵy qajyrly eńbegi erekshe baǵalanyp, « Qazaqstannyń eńbek sińirgen qaıratkeri» qurmetti ataǵyna ıe boldy. Marqumnyń kópten kútken marapatyn Qazaq radıosynyń Almatydaǵy stýdııasynda Mádenıet mınıstrliginiń tapsyrysy boıynsha «Qazaq gazetteri» JShS-niń Bas dırektory - redaktorlar keńesiniń tóraǵasy, belgili jýrnalıst Jumabek Kenjalın Qalqaman Júnisbekovtiń áıeli Roza Júnisbekovanyń qolyna ustatty. Bul jıynda Qazaq radıosynyń ardagerleri Amanjan Eńsebaıuly, Altyn Imanbaeva, Muhamedqul Smaǵulov sóz sóılep, ómirden ótken ardagerdiń shyǵarmashylyq jolyna erekshe toqtaldy. Ujymnyń atynan gúl shoǵy syılandy.
